Friends-ის მსახიობები ჯენიფერ ენისტონი, ლიზა კუდროუ და დევიდ შვიმერი მეთიუ პერის გარდაცვალებას გამოეხმაურნენ და მეგობარს ემოციური სიტყვებით დაემშვიდობნენ. ჯენიფერ ენისტონმა, რომელიც Friends-ში რეიჩელის როლს თამაშობს, სერიალიდან მოკლე ვიდეო და მეთიუსთან ერთად გადაღებული რამდენიმე ფოტო ინსტაგრამზე გამოაქვეყნა და გარდაცვლილ მსახიობს დაემშვიდობა.

"ჩვენს მეთიუსთან დამშვიდობება ემოციების ისეთი გიჟური ტალღა იყო, რომელიც აქამდე არასდროს განმიცდია. ის ყველას გვაცინებდა და გვამხიარულებდა. ბოლო რამდენიმე კვირაა თავიდან ვკითხულობ ჩემი და მეთიუს შეტყობინებებს, რომლებზეც ვიცინი, ვტირი და შემდეგ კვლავ ვიცინი. მეთიუ, ძალიან მიყვარხარ და ვიცი, რომ ახლა ყოველგვარი ტკივილის გარეშე მშვიდად ხარ", — წერს ჯენიფერ ენისტონი ინსტაგრამზე.

Friends-ში როსის როლის შემსრულებელი, დევიდ შვიმერი, მეთიუ პერის შემდეგი სიტყვებით დაემშვიდობა: "არასდროს დამავიწყდება შენი უზადო იუმორის გრძნობა. შეგეძლო, სრულიად ჩვეულებრივი დიალოგი აგეღო და შენი სურვილისამებრ ისე შეგეცვალა, რომ ორიგინალური და სასაცილო გამხდარიყო, რაც ისევ მაოცებს. შენი გულუხვობის წყალობით, რომელსაც ყველას გვიზიარებდი, 6 უცხო ადამიანისგან ოჯახის შექმნა შევძელით".

მეთიუ პერის გარდაცვალების შესახებ ინსტაგრამზე პოსტი ლიზა კუდროუმაც გამოაქვეყნა. "მადლობა ყველა იმ ფრაზისთვის, რომლებზეც ყოველდღე ისე მეცინებოდა, რომ სახის კუნთები მტკიოდა და ცრემლებიც მომდიოდა. მადლობა იმ 10 წლისთვის, რომელიც ნებისმიერი ადამიანისთვის საუკეთესო პერიოდი იქნებოდა", — წერს მსახიობი ინსტაგრამზე.

შეგახსენებთ, რომ სიტკომ Friends-ის მსახიობი და ჩენდლერის როლის შემსრულებელი მეთიუ პერი 28 ოქტომბერს 54 წლის ასაკში გარდაიცვალა. მსახიობი ლოს-ანჯელესში, საკუთარ სახლში, გარდაცვლილი იპოვეს, თუმცა ჯერჯერობით მისი გარდაცვალების მიზეზებზე ინფორმაცია ოფიციალურად არ დასტურდება.

ასევე იხილეთ: