მეთიუ პერის გარდაცვალება ისევ შოკისმომგვრელ ამბად რჩება როგორც ფანებისთვის, ასევე Friends-ის მსახიობებისთვის. მეთიუ პერის გარდაცვალებას ცოტა ხნის წინ კორტნი კოქსი გამოეხმაურა, რომელიც სერიალში მეთიუ პერის მეგობრის, შემდეგ კი ცოლის როლს ასრულებდა.

"მეთიუ, შენთან გატარებული ყოველი წამისთვის მადლობელი ვარ და მენატრები. როცა მუშაობისას ვინმესთან ისე ახლოს ხარ, როგორც მე მეთიუსთან ვიყავი, ათასობით მომენტი გახსენდება, რომელთა გაზიარებაც გინდა", — წერს კორტნი კოქსი ინსტაგრამზე და სერიალიდან მისთვის გამორჩეულ სცენას გვიზიარებს.

მსახიობმა Friends-დან ის სცენა გაიხსენა, როცა ჩენდლერი და მონიკა სასტუმროს ოთახში ლოგინში წვანან და ამ დროს როსი შემოდის. როსი მონიკას ვერ ხედავს, რაც სიტუაციას სასაცილოს ხდის, თუმცა ჩენდლერისა და მონიკას სასიყვარულო ისტორია სწორედ ამ მომენტიდან იწყება.

"მონიკასა და ჩენდლერს ერთად მხოლოდ ერთი ღამე უნდა გაეტარებინათ, მაგრამ მაყურებლის რეაქცია მათი სასიყვარულო ისტორიის დაწყების მიზეზი გახდა. სცენის გადაღებამდე მეთიუმ ყურში სასაცილო ფრაზა ჩამჩურჩულა. ასეთ რაღაცებს ხშირად აკეთებდა, რადგან ძალიან მხიარული და კეთილი იყო", — იხსენებს კორტნი კოქსი.

მეთიუ პერის გარდაცვალებას ვრცელი პოსტი მეთ ლებლანკმაც მიუძღვნა. მეთ ლებლანკი Friends-ში მეთიუ პერის პერსონაჟის, ჩენდლერის, საუკეთესო მეგობრისა და რუმმეითის როლს ასრულებს.

"მეთიუ, შენთან გამომშვიდობება ძალიან მიმძიმს. ის დრო, რომელიც ერთად გავატარეთ, ჩემი ცხოვრების ერთ-ერთი საუკეთესო პერიოდია. შენთან მეგობრობა და სცენის გაზიარება ჩემთვის დიდი პატივი იყო. როცა შენზე ვფიქრობ, ყოველთვის მეღიმება და არასდროს დაგივიწყებ. გაშალე ფრთები და იფრინე, ძმაო, საბოლოოდ თავისუფალი ხარ. როგორც ვხვდები, ის 20 დოლარი შეგიძლია დაიტოვო, რომელიც ჩემთვის უნდა დაგებრუნებინა", — წერს მეთ ლებლანი ინსტაგრამზე.

შეგახსენებთ, რომ სიტკომ Friends-ის მსახიობი და ჩენდლერის როლის შემსრულებელი მეთიუ პერი 28 ოქტომბერს 54 წლის ასაკში გარდაიცვალა. მსახიობი ლოს-ანჯელესში, საკუთარ სახლში, გარდაცვლილი იპოვეს, თუმცა ჯერჯერობით მისი გარდაცვალების მიზეზებზე ინფორმაცია ოფიციალურად არ დასტურდება.

ასევე იხილეთ: