ფოტოები: Twin Peaks-ის ახალი სეზონის თითო სერია თითო პოსტერში

2017 წლის მაისში, ტვინ პიკსის ახალი სეზონით დაბრუნებით აღფრთოვანებულმა ილუსტრატორმა კრისტიანო სექუიერამ, გადაწყვიტა თითოეული სერიისთვის ერთი პოსტერი მიეძღვნა და ამით გამოეხატა თავისი სიყვარული დევიდ ლინჩის, ანჯელო ბადალამენტისა და მარკ ფროსტის მიერ შექმნილი სამყაროს მიმართ.

"ჩემი ჩანაფიქრი იყო, რომ თითოეულ სერიაზე ერთი პოსტერი შემექმნა, თუმცა, ვფიქრობ, მხოლოდ ერთი პოსტერით ტვინ პიკსის სიღრმეს ვერ გამოვხატავ", ამბობს სან-პაოლოელი ილუსტრატორი.

მისი თქმით, ტვინ პიკსის ახალი სერიები უფრო დამაინტრიგებელი და სიურრეალისტურია, ვიდრე 90-იან წლებში გადაღებული პირველი ორი სეზონი:

"58 წუთიდან ერთი მომენტის ამორჩევა არც ისე მარტივია. ვაღიარებ, ამ მხრივ მეხუთე ნაწილი ყველაზე რთული იყო, დანახვისთანავე ბეკი ბარნეტის [შელი ჯონსონის შვილი, რომლის როლსაც ამანდა სეიფრიდი ასრულებს] დახატვა მსურდა, თუმცა ამ სერიაში მისი გამოჩენის შემდეგ იმდენი რამ მოხდა!" - ამბობს ის და დასძენს, რომ საბოლოოდ გადაწყვიტა ინტუიციას მინდობოდა.

კრისტიანოს ილუსტრაციები ყოველკვირეულად გამოდის. გამონაკლისია მეცხრე სერიის პოსტერი, რომელიც ჯერ არ გამოსულა, რადგან ტვინ პიკსის მერვე, გამაოგნებელი, სერიის შემდეგ, მეცხრე სერია 2 კვირის შემდეგ გამოვიდა.

ეს სტატია ყოველი პოსტერის შემდეგ განახლდება და კრისტიანოს ახალი ნამუშევარი დაემატება.

"იმედი მაქვს, როდესაც მესამე სეზონი დასრულდება, 18-ვე სერიის პოსტერი სრულად აღწერს ტვინ პიკსის დაბრუნებას", ამბობს ილუსტრატორი.

განახლება: დევიდ ლინჩმა 14 სექტემბერს თქვა, რომ ტვინ პიკსი შესაძლოა გაგრძელდეს, მაგრამ ფანებს მოცდა მოუწევთ. 15 სექტემბერს კი, ცნობილი გახდა, რომ საქართველოს ნოემბერში ეწვევა.