დღეს, 8 ივნისს, საქართველოს პრეზიდენტი გიორგი მარგველაშვილი ევროპული საბჭოს პრეზიდენტს, დონალდ ტუსკს შეხვდა. ტუსკი შეხვედრის დეტალებს განცხადებით გამოეხმაურა, სადა ის წერს, რომ ოქტომბრის საპარლამენტო არჩევნები საქართველოს დემოკრატიის მნიშვნელოვანი გამოცდა იქნება. მისივე თქმით, თავისუფალი და პლურალური მედია დემოკრატიული არჩევნების მნიშვნელოვანი წინაპირობაა:

"შეშფოთებას გამოვთქვამ ოპოზიციისა და პარლამენტის წევრების მიმართ განხორციელებულ ძალადობაზე. მივესალმები იმ ფაქტს, რომ დამნაშავეებს უკვე წაუყენეს ბრალი. ყველაფერი უნდა გაკეთდეს იმისათვის, რათა მსგავსი ინციდენტები მომავალში აღარ განმეორდეს. მადლობას ვუხდი პრეზიდენტ მარგველაშვილს, ამ მოვლენების ასეთი მკაფიო და მკვეთრი შეფასებისთვის. ჩვენი მოლოდინია, რომ საქართველოს ხელისუფლება ყველაფერს გააკეთებს იმისათვის, რომ მოწესრიგებული საარჩევნო გარემო უზრუნველყოს".

დონალდ ტუსკის თქმით, საქართველო-ევროკავშირს შორის დადებული ასოცირების შეთანხმება, 1 ივლისს შევა სრულად ძალაში:

"ქართველი ხალხის ძლიერი პრო-ევროპული კურსი არის ბაზისი იმისა, რომ ქვეყანაში რეფორმები და დემოკრატიის განვითარება გაგრძელდეს. კიდევ ერთხელ მხარს ვუჭერთ საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში".