დეტალები: მედიამ, პარტია ქართული ოცნების თავმჯდომარეს, ირაკლი კობახიძეს, შოვის სტიქიის შედეგები შეახსენა და ისიც, რომ გამოძიების მიმდინარეობის მიუხედავად, ჯერ არავის პასუხისმგებლობა დამდგარა.

  • პასუხად, კობახიძე ამბობს, რომ ტერიტორიაზე, სადაც იყო მსხვერპლი, კოტეჯები 60-იან წლებში აშენდა: "შეიძლება ცოცხლებიც აღარ არიან ის ადამიანები, ვინც გადაწყვიტა იქ კოტეჯების ჩადგმა, ამიტომ უნდა დააზუსტოთ, ვის პასუხისმგებლობაზე საუბრობთ", — უთხრა ჟურნალისტებს.
  • მან, ასევე, დაამატა, რომ სტიქია სპონტანური იყო და არ ექვემდებარებოდა პროგნოზირებას.

მნიშვნელოვანია, რომ: გარემოს ეროვნული სააგენტოს 2021 წლის დოკუმენტში შოვში ღვარცოფული პროცესის საშიშროებაზეა საუბარი.

  • დოკუმენტის თანახმად, რაჭაში, სტიქიის ადგილას, მდინარე ჭანჭახის მარცხენა შენაკადის მდინარე დღვიორას ხეობაში ღვარცოფის საშიშროების რისკი მაღალია.
  • ღვარცოფული პროცესი საშიშროებას უქმნის ცენტრალურ საავტომობილო გზას და კურორტ შოვის ინფრასტრუქტურულ ობიექტებს.
  • რეკომენდაციების ნაწილში ხაზგასმულია, რომ უნდა მოხდეს მდინარე დღვიორას პერიოდული გაწმენდა, დაღრმავება და ბორტების გამაგრება და ხეობაში გეოდინამიკური პროცესების მუდმივი მონიტორინგი.

გარდა ამისა, 2020 წელს მოსალოდნელ საფრთხეებზე საუბრობდა მოქალაქე. ის სოციალურ ქსელში ფოტოებს აქვეყნებდა და წერდა, რომ მდინარე ბუმბულას ადიდების გამო მთავარი გზა დაზიანდა.

  • მარიტა გუტაშვილი ამბობდა, რომ მიუხედავად ინფორმირებულობისა, ონის რაიონულმა გამგეობამ ქმედითი ნაბიჯები არ გადადგა.
  • "მხოლოდ ამოსვლით, ნახვით, ფოტოების გადაღებითა და მწუხარების გამოხატვით შემოიფარგლა".

არქივიდან: 2023 წლის 3 აგვისტოს, რაჭაში, შოვში, სასტუმრო სანსეტ შოვის მიმდებარედ, მეწყერი ჩამოწვა.

  • ოფიციალური ცნობით, სტიქიის შედეგად 32 ადამიანი დაიღუპა.
  • ათეულობით ადამიანი, რომლებმაც გადარჩენა მოახერხა, სტიქიის ზონიდან რამდენიმე საათის შემდეგ გამოიყვანეს.
  • შოვში მომხდართან დაკავშირებით გამოძიება სისხლის სამართლის კოდექსის 240-ე და 116 მუხლებით მიმდინარეობს.
  • აღნიშნული გულისხმობს სამთო, სამშენებლო ან სამუშაოს წარმოებისას უსაფრთხოების წესის დარღვევას და გაუფრთხილებლობით ადამიანის სიცოცხლის მოსპობას.