ბაქოში დაკავებული აზერბაიჯანელი ჟურნალისტის, აფგან მუხტარლის ადვოკატის, არჩილ ჩოფიკაშვილის განცხადებით, საქმეს "აფგან მუხტარლი საქართველოსა და აზერბაიჯანის წინააღმდეგ", სტრასბურგის ადამიანის უფლებათა სასამართლომ მიანიჭა "პრიორიტეტული", რაც გულისხმობს, რომ ევროსასამართლოში საქმეს დაჩქარებული წესით განიხილავენ.

ამასთან, აფგან მუხტარლის ცოლი, ლეილა მუსტაფაევა On.ge-სთან საუბრისას აცხადებს, რომ ეჭვი აქვს საქართველოში მას უთვალთვალებენ. ის იხსენებს გასული კვირას მომხდარ შემთხვევას, როდესაც აზერბაიჯანის ოპოზიციური პარტიის ლიდერს, არიფ ჰაჯილს შეხვდა თბილისში. ლეილა მუსტაფაევა მიიჩნევს, რომ სასტუმროში შეხვედრისას, მათ დრონის მეშვეობით უთვალთვალებდნენ:

"ჩვენ რამდენჯერმე შევიცვალეთ ადგილსამყოფელი, ჩავედით ეზოში, გავედით აივანზე, თუმცა ყოველ ჯერზე დრონი გვიყურებდა. არ ვიცი ეს არის თუ არა საქართველოს უსაფრთხოების ძალები, მაგრამ თუკი აზერბაიჯანული მხარეა, ეს ნიშნავს იმას, რომ საქართველო ნებას რთავს აზერბაიჯანს, ისევ გვითვალთვალონ".

ლეილა მუსტაფაევა კიდევ ერთ ფაქტს ჰყვება, რომ გასულ კვირას, თავისუფლების მოედანზე, ერთ-ერთ კაფეში მეგობართან ერთად ყოფნისას, სავარაუდოდ, მისი საუბრის ჩაწერა სცადეს:

"ძალიან საეჭვო სიტუაცია იყო და პოლიციაშიც განვაცხადეთ, მაგრამ ჯერ არ შეუტყობინებიათ უცნობი პირის ვინაობა".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.