28 ტელევიზია მიიჩნევს, რომ საქართველოს კანონმდებლობით საზოგადოებრივი მაუწყებლისთვის კომერციული რეკლამისთვის მეტი დროს გამოყოფა უარყოფითად აისახება კერძო მაუწყებლებზე. ამ საკითხზე მაუწყებლობის შესახებ კანონში შესატან ცვლილებებს ტელევიზიები დღეს, 6 ივლისს გამოეხმაურნენ და პარლამენტს მიმართეს, რათა არ განიხილონ შესაბამისი ცვლილებების ამოქმედება. განცხადებას არ უერთდებიან ჰოლდინგ იმედში შემავალი ტელეარხები - იმედი, მაესტრო და GDS.

"გარანტირებული შემოსავლები ბიუჯეტიდან საზოგადოებრივ მაუწყებელს აძლევს საშუალებას სარეკლამო ბაზარზე არაკეთილსინდისიერი მოთამაშე გახდეს – დემპინგური ფასებითა და გაუგებარი ფასწარმოქმნის პრინციპით, რითაც დააზარალებს სარეკლამო ბაზარს და განსაკუთრებულ ზიანს მიაყენებს რეგიონულ და მცირებიუჯეტიან მაუწყებლებს. თავად საზოგადოებრივი მაუწყებლის შიგნით კი იქმნება კორუფციის რისკები," - აღნიშნავენ ტელევიზიები.

მათი თქმით, 2015 წლამდე არსებული პრაქტიკა აჩვენებს, რომ საზოგადოებრივი მაუწყებლის მიერ რეკლამითა და სპონსორობით მიღებული შემოსავალი იყო იმაზე ნაკლები, ვიდრე შეზღუდვების ამოქმედების შემდეგ. ტელევიზიებს მიაჩნიათ, რომ ეს გარემოება საფუძველს აცლის ცვლილების დასაბუთებას და ადასტურებს მის პრობლემურობას.

"სპონსორობა ქმნის გადაცემის შინაარსზე უფრო მეტი გავლენის მოხდენის საფრთხეს და ეწინააღმდეგება საზოგადოებრივი მაუწყებლის მთავარ იდეას – იყოს თავისუფალი არა მხოლოდ პოლიტიკური, არამედ კომერციული გავლენისაგან. იგივე საფრთხეს შეიცავს კომერციული რეკლამაც," - ვკითხულობთ განცხადებაში.

ამავე განცხადების მიხედვით, საზოგადოებრივი მაუწყებლისთვის ბიუჯეტით გარანტირებული წლიური დაფინანსება მუდმივად აღემატება მთლიანი ტელე სარეკლამო ბაზრის მოცულობის ნახევარს. ამ გარემოებიდან გამომდინარე, მიაჩნიათ, რომ შეზღუდული სარეკლამო ბაზრის პირობებში, ცვლილება უარყოფით გავლენას იქონიებს კერძო მაუწყებლების მდგრადობაზე.

"ყველა ქართული ტელევიზიის ჯამური წლიური შემოსავლისა და მაუწყებლის წლიური ბიუჯეტის შედარება ადასტურებს, რომ საზოგადოებრივი მაუწყებლის მთავარი პრობლემა არ გახლავთ ბიუჯეტის სიმცირე და პრობლემების მიზეზები სხვაგან უნდა ვეძებოთ", - დასძენენ ტელევიზიები.

მათი თქმით, საზოგადოებრივი მაუწყებელი ფლობს არაერთ არხს და მისი ტექნიკური რესურსი საშუალებას აძლევს გაზარდოს არხების რაოდენობა, მენეჯმენტი საუბრობს ახალი სპორტული არხის შექმნაზე, ყოველი ახალი არხი კი დამატებითი სარეკლამო დროა საზოგადოებრივი მაუწყებლისთვის.

განცხადების ხელმომწერი ტელეკომპანიები არიან:

  1. რუსთავი 2
  2. კომედი არხი
  3. მარაო
  4. TV პირველი
  5. TV პალიტრანიუსი
  6. კავკასია
  7. სტარვიზია
  8. მედია-კავშირი ობიექტივი
  9. გურია TV
  10. ოდიში TV
  11. მეცხრე ტალღა
  12. კოლხეთი 89
  13. ჯიხა
  14. რიონი TV
  15. TVზარი
  16. იმერვიზია
  17. არგო TV
  18. დია
  19. მეცხრე არხი
  20. ბორჯომი ტვ
  21. ATV12
  22. ფარვანა
  23. ქვემო ქართლი TV
  24. მარნეული TV
  25. ბოლნელი TV
  26. TV თანამგზავრი გურჯაანი
  27. TV ეგრისი
  28. TV 25

საზოგადოებრივი მაუწყებლის ინიციატივით, საქართველოს პარლამენტი "მაუწყებლობის შესახებ კანონში" შესატან ცვლილებებს განიხილავს. ამ ცვლილებებით მას პროგრამების ნაწილში სპონსორობის უფლება და კომერციული რეკლამის განთავსების უფლება ექნება.