მოკლედ: საკონსტიტუციო სასამართლოში პრეზიდენტის წარმომადგენლები არ ეთანხმებიან სასამართლოს დასკვნას, რომლის მიხედვით, სალომე ზურაბიშვილმა საზღვარგარეთ განხორციელებული ვიზიტებით კონსტიტუცია დაარღვია.

  • ამის შესახებ თამარ ჩუგოშვილმა და მაია კოპალეიშვილმა ორბელიანების სასახლეში გამართულ პრესკონფერენციაზე განაცხადეს.

რა თქვეს:

  • მაია კოპალეიშვილმა აღნიშნა, რომ საკონსტიტუციო სასამართლომ სრულად გაიზიარა ქართული ოცნების საპარლამენტო უმრავლესობის კონსტიტუციური წარდგინების მოსაზრებები და ტექსტში "ტერმინებიც კი არ შეცვალა".
    "ეს კიდევ ერთხელ მიუთითებს, რომ საკონსტიტუციო სასამართლო, ფაქტობრივად, ამ დასკვნით მთლიანად შევიდა პოლიტიკურ პროცესში," - განაცხადა კოპალეიშვილმა.

თამარ ჩუგოშვილის თქმით კი, არანაირი მტკიცებულება არ არსებობს, რომ პრეზიდენტმა თავისი ქმედებით, ხელი შეუშალა საქართველოს ევროკავშირის კანდიდატის სტატუსის მიღებაში:

  • "პირიქით, მას უწყობენ იმპიჩმენტს იმის გამო, რომ იგი აკეთებდა ყველაფერს თავისი უფლებამოსილების ფარგლებში, რათა ამ ქვეყანას დახმარებოდა სტატუსის მიღებაში", — აღნიშნა ჩუგოშვილმა.

მისივე თქმით, თუ პროცესი დამაზიანებელი აღმოჩნდება საქართველოს დასავლური კურსისთვის და შეაფერხებს სტატუსის მინიჭებას, "პასუხისმგებლობას ამ შედეგზე საპარლამენტო უმრავლესობასთან ერთად გაიზიარებს საკონსტიტუციო სასამართლო".