რა ხდება: ნაადრევი ქორწინების მსხვერპლი, 14 წლის გოგო "ქმარმა" 6 ოქტომბერს, ცეცხლსასროლი იარაღით მოკლა.

  • შემთხვევის შემდეგ ის ადგილიდან მიიმალა. პოლიციამ მისი დაკავება 10 ოქტომბერს მოახერხა.
  • მას ბრალი ედება არასრულწლოვანი ოჯახის წევრის მიმართ, გენდერის ნიშნით ჩადენილ განზრახ მკვლელობასა და იარაღის უკანონოდ ტარებაში.
  • დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

დეტალები: პროკურატურამ 14 წლის ბავშვის მკვლელობის საქმეზე, ბრალდებულის ბიძასა და ბიძაშვილს ბრალი წარუდგინა.

  • უწყების ცნობით, მათ ბრალი ედებათ მძიმე დანაუშალის შეუტყობინებლობისთვის.
  • შსს-ს ინფორმაციით, გამოძიებით დადგინდა, რომ არასრულწლოვანს ქორწინების იძულების მიზნით, გამტაცებელმა უკანონოდ აღუკვეთა თავისუფლება და შეუზღუდა გადაადგილების თავისუფლება.
  • უწყების მტკიცებით, ეს ფაქტი ცნობილი იყო არასრულწლოვნის ბიძისა და ბიძაშვილისთვისაც, თუმცა მათ დანაშაულის შესახებ სამართალდამცავ ორგანოებს არ შეატყობინეს.
  • არასრულწლოვანმა მოახერხა გაქცევა და უცხო პირის ტელეფონით დედას დაუკავშირდა, მაგრამ ოჯახის წევრებმა ის გამტაცებელთან დააბრუნეს და მასთან ცხოვრება აიძულეს.
  • ბრალდებულის ბიძასა და ბიძაშვილს ბრალი წარედგინათ სისხლის სამართლის კოდექსის 376-ე მუხლის პირველი ნაწილით [დანაშაულის შეუტყობინებლობა იმის მიერ, ვინც ნამდვილად იცის, რომ ჩადენილია მძიმე დანაშაული].
  • დანაშაული ორიდან ექვს წლამდე თავისუფლების აღკვეთას ითვალისწინებს.

სახალხო დამცველის განცხადებით, ქვეყანაში კვლავ პრობლემად რჩება როგორც ბავშვთა ქორწინების შემთხვევები, ასევე, ქორწინების იძულების ფაქტები.

  • "სახელმწიფოს მიერ გადადგმული ნაბიჯები ადრეულ ასაკში ქორწინებისა და ფემიციდის შემთხვევებზე არასაკმარისია და საჭიროებს სისტემურ და კოორდინირებულ მუშაობას როგორც ცენტრალურ, ასევე ადგილობრივ დონეზე", — აღნიშნულია ომბუდსმენის განცხადებაში.

დღეს, 15 სექტემბერს, მომხდართან დაკავშირებით, პარლამენტთან მდუმარე აქცია, სახელმწოფებით, "ბავშვი ცოლი არ არის" გაიმართება.

  • აქცია 20:00 საათზე დაიწყება.
  • "ჩვენ, მოქალაქეები და არასამთავრობო ორგანიზაციები, გამოვხატავთ სოლიდარობას არამხოლოდ გარდაცვლილი მოზარდის მიმართ, არამედ დახმარებასა და მხარდაჭერას ვთავაზობთ იმ ბავშვებსა თუ ქალებს, რომლებიც ახლაც, ამ წამსაც, განიცდიან ნებისმიერი სახის ძალადობას", — აღნიშნულია აქციის ორგანიზატორთა განცხადებაში.