ერთიანი ნაციონალური მოძრაობის თბილისის მერობის კანდიდატი, ზაალ უდუმაშვილი დღეს შიდა ქართლში, იმ ადგილზე იმყოფებოდა, სადაც რამდენიმე დღის წინ რუსმა მესაზღვრეებმა სამხრეთ ოსეთის დე-ფაქტო რესპუბლიკის აღმნიშვნელი ბანერი აღმართეს.

უდუმაშვილმა ხელისუფლება უმოქმედობაში დაადანაშაულა:

"საერთაშორისო სამართლის ნორმების და საოკუპაციო ხაზის გადმოწევა ყოველთვის ხშირდება იმ დროს, როდესაც ახლოვდება პრაღაში აბაშიძე-კარასინის შეხვედრა. ამ ბანერიდან საქართველოს მთავარი არტერია - ცენტრალური მაგისტრალი ხუთასი მეტრით არის დაშორებული. მე მინდა ვკითხო საქართველოს ხელისუფლებას, ნუთუ ვერ გაიგეთ, რომ თქვენთან მოლაპარაკებები მოსკოვისთვის არის მხოლოდ შირმა. საერთაშორისო ზეწოლის მოხსნამ მიგვიყვანა იქამდე, რომ საქართველო საერთაშორისო თანამეგობრობის დღის წესრიგში საერთოდ აღარ დგას. ამიტომ, თვითმმართველობის არჩევნები, რეალურად უნდა გახდეს რეფერენდუმი საქართველოს მოსახლეობისთვის".