არასამთავრობო ორგანიზაციის წარმომადგენლები ახალციხეში პლატფორმა Defend Liberty-ს მიერ დაგეგმილი კონცერტის მერიის მხრიდან გაუქმებას ეხმაურებიან და მას უკანონობად აფასებენ.

"მუნიციპალიტეტის მერიის მხრიდან სახეზეა კონსტიტუციით აღიარებული შეკრების უფლების განხორციელების შეზღუდვის მცდელობა.

საქართველოს კონსტიტუციის თანახმად, შეკრებისა და მანიფესტაციის შესახებ ხელისუფლებისადმი წინასწარი შეტყობინების ვალდებულება შეიძლება მხოლოდ იმ შემთხვევაში დაწესდეს,როცა შეკრება ან მანიფესტაცია იმართება ხალხისა და ტრანსპორტის სამოძრაო ადგილას, ხოლო "შეკრებისა და მანიფესტაციების შესახებ" საქართველოს კანონი აკონკრეტებს კონსტიტუციურ დებულებას და გაფრთხილების ვალდებულებას მხოლოდ ტრანსპორტის სამოძრაო ადგილას შეკრების გამართვის შემთხვევაში ითვალისწინებს.

სხვა ადგილებში შეკრება-მანიფესტაციის გამართვას სახელმწიფოს მხრიდან არათუ თანხმობა არ სჭირდება, არამედ, მხარეს ხელისუფლების გაფრთხილების ვალდებულებაც კი არ გააჩნია" - წერია განცხადებაში.

არასამთავრობოების თქმით, იმის გათვალისწინებით, რომ კონცერტის გამართვა დაგეგმილია ქალაქის ხალხმრავალ ადგილას - პარკში, უსაფუძვლოა მერიის მტკიცება, რომ ღონისძიება პრობლემას შეუქმნის რომელიმე დაწესებულებას, მათ შორის თეატრის ნორმალურ ფუნქციონირებას.

დღეს, 8 ივნისს, ახალციხეში, ჯგუფი გამოუვალი მდგომარეობა ევროინტეგრაციის მხარდამჭერი კონცერტის ჩატარებას გეგმავს. კონცერტი ლიტვის საელჩოს მხარდაჭერით იმართება. მერიამ კამპანია დაიცავი თავისუფლებას წერილობით უარი უთხრა ხსენებული ღონისძიების ჩატარებაზე და მისი გამართვის შემთხვევაში, შეკრება წინასწარ უკანონოდ გამოაცხადა.

არასამთავრობოები ახალციხის მუნიციპალიტეტის მერიას და ცენტრალურ ხელისუფლებას მოუწოდებენ დაუყოვნებლივ მიიღონ სათანადო ზომები შეკრების უფლების სარგებლობისთვის და დაიცვან თითოეული დამსწრე პირის შეკრების კონსტიტუციური უფლება.

განცხადების ხელმომწერები არიან:

  • საქართველოს დემოკრატიული ინიციატივა - GDI
  • ტოლერანტობის და მრავალფეროვნების ინსტიტუტი (TDI)
  • მედიის განვითარების ფონდი - MDF
  • თავისუფლების ინსტიტუტი - Liberty Institute
  • ბალტიისა და შავი ზღვის ალიანსი - საქართველო
  • ლგბტ საქართველო - LGBT Georgia