ცოტა ხნის წინ ესპანეთში ხარების რბოლის ტრადიციული ფესტივალი ჩატარდა. 61 წლის კაცს, რომელიც ფესტივალს მეგობართან ერთად ესწრებოდა, ხარმა ურქინა. კაცი მაშინვე ადგილობრივ საავადმყოფოში გადაიყვანეს და ოპერაციაც გაუკეთეს, თუმცა მოგვიანებით გარდაიცვალა.

გარდაცვლილის მეგობარი 63 წლის კაციც დაშავებულია. მეგობრებს ერთი ხარი დაესხა თავს და ურქინა. კაცს ორივე ფეხი დაზიანებული აქვს და საავადმყოფოში რჩება, მისი მდგომარეობა ამ ეტაპზე სტაბილურია.

ესპანეთის ხარების რბოლის ფესტივალზე გარდაცვალებისა და დაზიანებების შემთხვევები ხშირია. ფესტივალის დროს ხარებს ათავისუფლებენ და ქალაქის ქუჩებში უშვებენ, სადაც ხალხი მათ წინ დარბის. შეტაკების შემთხვევები კი, ძირითადად ადამიანთა დაშავებითა და გარდაცვალებით სრულდება.

მიუხედავად იმისა, რომ ცხოველების უფლებების დამცველთა ჯგუფები ფესტივალის ჩატარებას დიდი ხანია აპროტესტებენ, ყოველწლიური ღონისძიება დღემდე პოპულარულია. ხარების რბოლა ვალენსიის ეკონომიკისთვისაც მნიშვნელოვანია. 2019 წლის მონაცემებით, 3000-ზე მეტი სამუშაო ადგილი შეიქმნა, ფესტივალების შემოსავალმა კი 300 მილიონი ევრო შეადგინა.