დღეს ლიბერთის მხარდაჭერითა და პარტნიორობით დედაენის ბაღში პირველი სპორტული ფესტივალი, SPORTFEST დაიწყო.

ფესტივალი პირველად 2022 წელს ჩატარდა და მასში მონაწილეობა 60-ზე მეტმა სპორტულმა ორგანიზაციამ და 15000-ზე მეტმა ადამიანმა მიიღო. ფესტივალის მიზანია, გააერთიანოს სპორტის ენთუზიასტები, პროფესიონალები, გულშემატკივრები და სპორტული ორგანიზაციები. ასევე, შეკრიბოს სხვადასხვა ასაკის ადამიანი და დააინტერესოს ჯანსაღი და აქტიური ცხოვრების წესით.

ლიბერთი, SPORTFEST-ის მხარდაჭერით, საშუალებას აძლევს ყველა თაობის ადამიანს გაეცნოს სპორტის სხვადასხვა სახეობას, შეხვდეს ცნობილ სპორტსმენებს და მრავალფეროვანი აქტივობებით გაერთოს ოჯახთან და მეგობრებთან ერთად.

წელს ფესტივალი უფრო მასშტაბურია, რის გამოც სტუმრებს ადგილზე დახვდებათ სპორტის სხვადასხვა სახეობისთვის განკუთვნილი სივრცეები, სპორტული მოედნები, სცენა და საბავშვო გასართობი და კვების ზონები.

ფესტივალის პირველ დღეს, 23 სექტემბერს, ლიბერთის სივრცეში მსოფლიოს ვიცე-ჩემპიონი, საჭადრაკო ოლიმპიადის ხუთგზის ჩემპიონი, ნანა იოსელიანი, საჭადრაკო დაფასთან ერთდროულად შეხვდება სხვადასხვა ასაკის მოთამაშეებს. ამავე დღეს ლიბერთის სივრცეში საქართველოს ჩემპიონი, 12 წლის ერეკლე ტაბატაძე, ერთდროულად შეეჯიბრება ჭადრაკის მოყვარულებს.

ფესტივალის მეორე დღეს, 24 სექტემბერს, მსოფლიოს ხუთგზის ჩემპიონი, საჭადრაკო ოლიმპიადის თერთმეტგზის ჩემპიონი და პირველი ქალი საერთაშორისო დიდოსტატი ვაჟთა შორის, ნონა გაფრინდაშვილი, ერთდროულად შეხვდება ჭადრაკის პროფესიონალ და მოყვარულ მოთამაშეებს.

ფეხბურთის მოყვარულებს ლიბერთის სივრცეში, მინი ფეხბურთის მოედანზე, ქალთა საფეხბურთო კლუბ ლანჩხუთის ფეხბურთელი გოგოები უმასპინძლებენ.

ფესტივალზე დასწრება თავისუფალია. ორი დღის მანძილზე, 23 და 24 სექტემბერს, სპორტული აქტივობები 12:00 საათიდან 20:00 საათამდე გაგრძელდება.