ლიბიის აღმოსავლეთ ნაწილში ძლიერ შტორმსა და წყალდიდობას 2000 ადამიანი ემსხვერპლა. ხელისუფლების ცნობით, ათასობით ადამიანი ამ ეტაპზე დაკარგულად ითვლება. სტიქიის ეპიცენტრად ქალაქი დერნა დასახელდა, რომელიც სანაპიროზე მდებარეობს. ქარიშხალმა ათასობით შენობა გაანადგურა და სანაპიროზე მდებარე სხვა დასახლებებსაც შეეხო.

ფოტო: AP

გასულს შაბათ-კვირას გავრცელებული ინფორმაციით, სტიქიის შედეგად მსხვერპლი მხოლოდ 61 ადამიანი იყო, თუმცა ეს მონაცემები ქალაქ დერნაში დაღუპულ ადამიანებს არ მოიცავდა. სტიქიამ ყველაზე მეტად ლიბიის აღმოსავლეთით მდებარე ქალაქები ბენგაზი, სუსი და დერნა დააზიანა. ლიბიის ეროვნული არმიის განცხადებით, რომელიც ქვეყნის აღმოსავლეთ ნაწილს აკონტროლებს, სტიქიამ ყველაზე მეტად ქალაქი დერნა დააზიანა, დაკარგული მოქალაქეების რაოდენობა კი 5000-დან 6000-მდეა.

ფოტო: AP

შეგახსენებთ, რომ 2011 წლის აჯანყებისა და ლიბიის ლიდერის, მუამარ კადაფის, მკვლელობის შემდეგ ქვეყანა ორ ნაწილად გაიყო. ლიბიას ცენტრალური მთავრობა არ ჰყავს, დღემdე ქვეყანა დასავლეთ და აღმოსავლეთ ნაწილებად არის გაყოფილი. ქვეყნის აღმოსავლეთ ნაწილს კი ლიბიის ეროვნული არმია აკონტროლებს.

ფოტო: AP

ბოლო დღეების განმავლობაში ინტერნეტში დერნას მოსახლეობის მიერ ვიდეოები ვრცელდებოდა. ვიდეოებში ჩანს, რომ საცხოვრებლები სახლები დანგრეულია, კორპუსები კი ნაწილობრივ ტალახით არის დაფარული.