ჩრდილოეთ ინგლისში, ლინკოლნშირის პატარა სოფელში, იოგას გაკვეთილი მასობრივი მკვლელობა ეგონათ. როდესაც რამდენიმე გამვლელმა იმ შენობასთან ჩაიარა, რომელშიც იოგა ტარდებოდა, მათ სანთლებით განათებულ ნახევრად ბნელ ოთახში მწოლიარე ადამიანები დაინახეს, რომელთაც ერთი ადამიანი (იოგას მასწავლებელი) გარს უვლიდა და ჩათვალეს, რომ რიტუალურ მკვლელობას შეესწრნენ.

გამვლელებმა ამბავი პოლიციას შეატყობინეს და მალე იოგას გაკვეთილი ხუთმა პოლიციის მანქანამ ჩაშალა. იოგას მასწავლებელ მილი ლოუს თავდაპირველად ყველაფერი ხუმრობა ეგონა, თუმცა შემდეგ, როცა მიხვდა, რატომ შეიძლება უცხო თვალს სიტუაცია რიტუალი ჰგონებოდა, თქვა, რომ ესმის გამვლელებს როგორ შეეშინდებოდათ.

მილი ჰყვება, რომ გაკვეთილზე მედიტირებდნენ, როდესაც ფანჯარაში წყვილმა შემოიხედა —შესაბამისი ატმოსფეროს შესაქმნელად ოთახი სანთლებით ჰქონდა განათებული, მოსწავლეები ძირს თვალდახუჭულები იწვნენ და საბნები ეფარათ.

"ფანჯარას წყვილი მოუახლოვდა ძაღლებით, შემოიხედეს, მაგრამ ძალიან მალევე წავიდნენ და ყურადღება აღარ მიმიქცევია", — აღნიშნა მილიმ.

კაფე Seascape-ის მენეჯერებმა, რომელთა შენობაშიც იოგას გაკვეთილი ტარდებოდა, პოლიციას მადლობა გადაუხადეს და სოციალურ ქსელში მომხმარებლებისთვის მომხდარი განმარტეს.