წლიური საერთაშორისო ღონისძიება Rally Adventure Georgia — სათავგადასავლო რალი საქართველო ოქტომბერში მეხუთედ ჩატარდება.

ეს არის ყველაზე მაშტაბური საავტომობოლო შეჯიბრი უგზოობაზე, რომელიც საქართველოში ტარდება და რომელსაც აქვს ჰუმანიტარული მისიაც.

ტრადიციულად, რალი მოივლის დაახლოებით 1600 კილომეტრს საქართველოს ტერიტორიაზე ერთი კვირის განმავლობაში, მარშრუტი კი ყოველ წელს იცვლება. რალის ეკიპაჟები შედგებიან 2 პირისგან : 1 ქალი და 1 კაცი (შერეული კატეგორია) ან 2 ქალი (ქალთა კატეგორია), ანუ ყველა ეკიპაჟში მინიმუმ ერთი წევრი არის ქალი. ღონისძიების მიზანია, დაამსხვრიოს სტერეოტიპი და საზოგადოებას აჩვენოს, რომ უგზოობაზე მართვა ქალების გატაცებაც შეიძლება იყოს და მათ არა ნაკლებად შეუძლიათ გაუმკლავდნენ უგზოობაზე მართვის სირთულეებს.

2019 წლიდან მოყოლებული შეჯიბრებაზე იასპარეზა 190-მა მონაწილემ 10 სხვადასხვა ქვეყნიდან (აქედან 110-მა ქალმა და 80-მა კაცმა) და რალის ფარგლებში დახმარებები დაურიგდა 100-ზე მეტ შემწეობამოკლებულ ოჯახს საქართველოს სხვადასხვა სოფლებში (ხულო, სხალთა, მესტია, მანგლისი, ახალციხე, დედოფლისწყარო, თეთრიწყქრო, საჩხერის რაიონი დარყა, ა.შ.).

ფოტო: სათავგადასავლო რალი საქართველო

როგორც ყოველ წელს, წლევანდელ ღონისძიებასაც ექნება ჰუმანიტარული მისია, რალის ეკიპაჟები რბოლისას თან წაიღებენ დახმარებებს (ჰიგიენურ საშუალებებს, თბილ ტანისამოსს, ფეხსაცმელებს, სათვალეებს, სასკოლო ნივთებს, წიგნებს, სათამაშოებს, ფულად დახმარებას) და ორ სხვადასხვა რეგიონში (იმერეთში და სამეგრელოში) დაურიგებენ შემწეობას მოკლებულ 50 ოჯახს.

სათავგადასავლო რალი საქართველო 2023 სტარტს აიღებს კვირას 1 ოქტომბერს დილით ადრე თბილისიდან. მონაწილეებს გზად უმასპინძლებენ სასტუმრო — Sairme და სასტუმრო — Palm Beach ანაკლიაში. დანარჩენ ღამეებს კი კარვებში გაატარებენ. ფინიში და დაჯილდოების ცერემონია გაიმართება შაბათს, 7 ოქტომბერს, საღამოს Rooms Hotel Kazbegi-ში, სტეფანწმინდაში.

სტარტზე და ფინიშზე დასწრება შეუძლია ყველა მსურველს.

იხილეთ ღონისძიების Facebook ბმული და ჩამოტვირთეთ სპორტული რეგლამენტი რალის ვებგვერდიდან.