შესწორება: ინფორმაცია თავდაპირველად მედიაჩეკერმა გაავრცელა.

რატომ არის მნიშვნელოვანი: მიმდინარე წლის აპრილში BBC Eye-მ მასშტაბური ჟურნალისტური გამოძიება გამოაქვეყნა, სადაც თავდაცვის ყოფილი მინისტრი და ფორმულას დამფუძნებელი, დავით კეზერაშვილი ქოლცენტრების თაღლითურ სქემებთან კავშირში ამხილა.

  • საზღვარგარეთ მყოფმა კეზერაშვილმა ბრალდებები უარყო და განაცხადა, რომ BBC-თან კითხვები აქვს და სამართლებრივ ბერკეტებს გამოიყენებს.
  • მოგვიანებით კი განაცხადა, რომ მის ირგვლივ შექმნილი მძიმე გარემოს მიუხედავად, პროცესებიდან გასვლას არ განიხილავს, თავისი წილების 25% გადასცემს ფორმულას თანამშრომლებს და გააგრძელებს არხის ფინანსურ დახმარებას.
  • "მას შემდეგ კი, რაც დასრულდება ოლიგარქიული მმართველობა, ფორმულას კოლექტივსვე სრულად გადავცემ ჩემს დარჩენილი წილსაც", — ეწერა კეზერაშვილის წერილში.
  • ამის შემდეგ ფორმულას დანარჩენმა დამფუძნებლებმა, მიშა მშვილდაძემ, გიორგი ლიფონავამ და ზუკა გუმბარიძემ განმარტეს, რომ მოამზადებდნენ სიას და ეს 25% გადაეცემოდა ჟურნალისტებს, რომლებსაც საზოგადოება კარგად იცნობს ეკრანებიდან და მათაც, ვინც კადრს მიღმა დგას, მაგრამ დიდ როლს თამაშობს ტელევიზიის მაუწყებლობაში.
  • როგორც გუმბარიძემ მაშინ განაცხადა, ამ პაკეტის მფლობელი პირები შექმნიდნენ ორგანიზაციას, სადაც აირჩევდნენ თავმჯდომარეს, რომელსაც წარადგენენ ფორმულას მმართველ ორგანოში.
  • ამის შემდეგ რადიო თავისუფლებამ გაავრცელა ინფორმაცია, რომ კეზერაშვილს ვადაგასული ქართული დოკუმენტები აქვს, შესაბამისად საჯარო რეესტრში წილების გადაფორმებას ვერ შეძლებდა.

რა ხდება ახლა: საჯარო რეესტრმა დაუკმაყოფილა კეზერაშვილის მოთხოვნა და მისი კუთვნილი 51%-იანი წილიდან 25% თანამშრომელთა გაერთიანებას, "თავისუფლების ფორმულას" გადაუფორმა.

  • ახლად დაფუძნებულ არაკომერციულ იურიდიულ პირთან ერთად ფორმულას 12,25%-იან წილებს ინაწილებენ: მიშა მშვილდაძე, ირაკლი საღინაძე, ზუკა გუმბარიძე და გიორგი ლიფონავა.
  • კეზერაშვილი კი კვლავ რჩება ყველაზე დიდი წილის, 26%-ის მფლობელად.

  • "მიუხედავად იმისა, რომ დამმოწმებელი ოფიცრისთვის წარდგენილ საქართველოს პასპორტს მოქმედების ვადა გასული ჰქონდა, კანონის თანახმად, დამმოწმებელ ოფიცერს შეეძლო, დაჰყრდნობოდა მოქმედ ქართულ მართვის მოწმობას აღნიშნული პირის ვინაობის დასადასტურებლად და მისი ხელმოწერის დასადასტურებლად. [...] დამმოწმებელმა ოფიცერმა შეძლო დაედასტურებინა, რომ ჩემ წინაშე გამოცხადებული პირი იყო ბატონი დავით კეზერაშვილი", — ნათქვამია საჯარო რეესტრში გამოქვეყნებულ განმარტებაში.

გაიგეთ მეტი BBC-ის გამოძიებაზე: