82 წლის კრისტოფერმა და 81 წლის როზამ ერთმანეთი ბრიტანეთის ერთ-ერთ მოხუცებულთა სახლში გაიცნეს. ისინი მოხუცებულთა სახლში მეუღლეების გარდაცვალების შემდეგ გადავიდნენ საცხოვრებლად. თითქმის 2-წლიანი ურთიერთობის შემდეგ კი მიხვდნენ, რომ ერთმანეთი შეუყვარდათ და დაქორწინება გადაწყვიტეს.

"მთელ დღეებს ერთად ვატარებდით და ვერთობოდით. ყველაზე კარგი ისაა, რომ სიცილში ძალიან დიდი დრო გავატარეთ", — აღნიშნა როზამ. წყვილის ქორწილს მოხუცებულთა სახლის და მათი ოჯახის წევრებიც დაესწრნენ. ხელის მოწერის შემდეგ კი, საქორწინო წვეულება ადგილობრივ რესტორანში გაგრძელდა.

ფოტო: BBC

"ჩვენთვის ქორწილი ძალიან ემოციური იყო. გვიხაროდა, რომ ცერემონიას ჩვენი შვილები და შვილიშვილებიც დაესწრნენ. ოჯახის სხვა წევრები, რომლებიც ახალ ზელანდიაში ცხოვრობენ, ქორწილს ლაივის მეშვეობით უყურებდნენ", — განაცხადა კრისტოფერმა.

წყვილი გაცნობისთანავე მიხვდა, რომ ძალიან ბევრი საერთო ჰქონდათ. მათ შორის კი ხელოვნების, თეატრის, ისტორიის, მუსიკისა და სოფლად ცხოვრების სიყვარული იყო. "ორივე 80 წელს გადავცდით და არ ვიცით, რამდენი დრო დაგვრჩა, თუმცა გვინდა, რომ ერთად გავატაროთ", — დასძინა კრისტოფერმა.