ბრიტანელმა ორსულმა ქალმა ქმართან ერთად 6400 კილომეტრი იფრინა, რათა ოცნება აეხდინა და კარიბის ზღვის სანაპიროზე ემშობიარა. ახლა ის 4 თვის ჩვილთან ერთად უცხო ქვეყანაშია გაჭედილი და როგორც ამბობს, "თავს პატიმრად გრძნობს".

38 წლის იულიასა და მის ქმარ კლაივს შვილი სენტ-ლუსიაში 23 აპრილს გემზე შეეძინათ, რის გამოც წყვილს ქვეყნის დატოვების პრობლემა შეექმნა. მშობიარობიდან რამდენიმე დღის შემდეგ იულიამ დაბადების მოწმობის დასარეგისტრირებლად ბავშვი ქალაქის ერთ-ერთ საავადმყოფოში მიიყვანა.

პერსონალის თქმით, რადგან იულიას საავადმყოფოში არ უმშობიარია, ბავშვის დაბადებას არავინ შესწრებია და მისი გაჩენიდან 24 საათზე მეტი გავიდა, საბუთის გაცემას ვერ მოახერხებენ. წყვილის პრობლემებიც სწორედ აქედან დაიწყო — ბავშვის პასპორტის გარეშე ისინი ქვეყანას ვერ დატოვებენ.

წყვილი სიტუაციის გამოსწორებას უკვე მეოთხე თვეა უშედეგოდ ცდილობს. მათ ყველა შესაბამის ორგანოს მიმართეს, საემიგრაციო და პასპორტის ოფისებს თუ დიდი ბრიტანეთის უმაღლეს კომისიას, თუმცა ყველგან მსგავს პასუხს იღებენ — წყვილმა უნდა დაამტკიცოს, რომ ბავშვი ნამდვილად მათია. ამის გამო ახალშობილს დნმ-ის ტესტი გაუკეთეს, ახლა კი, პასუხის მოლოდინში არიან.

ამასობაში ოთხი თვე გავიდა. წყვილის პრობლემებს ისიც ემატება, რომ მათ პირველი შვილი, ელიზაბეთი, ინგლისში ჰყავთ დატოვებული, რადგან ეგონათ, რომ მოგზაურობიდან რამდენიმე კვირაში დაბრუნდებოდნენ. პრობლემას ისიც ქმნის, რომ იულიასა და კლაივს საჭმლის, საცხოვრებლისა თუ სხვა საჭიროებებისთვის ვალების აღება მოუწიათ და თანხა უკვე უთავდებათ. მათი თქმით, მალე საჭმლის ფულიც აღარ ექნებათ და არავინ ეხმარებათ.

"ღამით ვერ ვიძინებ, ტირილს ვერ ვწყვეტ. ეს ძალიან ტრავმული გამოცდილებაა ჩვენთვის. შველას ვითხოვთ, მაგრამ ყველამ მიგვატოვა", — ამბობს იულია.