მიკროფონი, რომელიც ქარდი ბიმ ფანს ესროლა, აუქციონზე $99 900-ად გაიყიდა. მიკროფონი eBay-ის აუქციონზე სკოტ ფიშერმა გაიტანა, რომელიც იმ აუდიოწარმოების კომპანიის ხელმძღვანელია, რომელმაც ქარდი ბი ლას-ვეგასის კონცერტზე ტექნიკით მოამარაგა.

ინციდენტი ლას-ვეგასში 29 ივლისს მოხდა. ვიდეოში, რომელიც სოციალურ ქსელში ვირუსულად გავრცელდა, ჩანს, რომ ქარდი ბის ერთ-ერთი ჰიტის შესრულებისას ფანმა სასმელი შეასხა, რის შემდეგაც გაბრაზებულმა შემსრულებელმა მას მიკროფონი ესროლა.

აუქციონზე მიკროფონის აღწერის მიხედვით, ის ჯერ კიდევ მუშაობს და მყიდველს ფიშერის ხელნაწერთან ერთად გადაეცა, რომელიც ნივთის ავთენტურობას ადასტურებს. მისი ყიდვის სურვილი დაახლოებით 120-მა ადამიანმა გამოთქვა. ფიშერის თქმით, მოლოდინი ჰქონდა, რომ მიკროფონი $5000-ად გაიყიდებოდა და ამხელა გამოხმაურებას არ ელოდა.

ქარდი ბის მიერ ნასროლი მიკროფონი

ფოტო: CBS News

ინციდენტიდან რამდენიმე დღეში ლას-ვეგასის პოლიციაში ერთ-ერთმა მსმენელმა საჩივარი შეიტანა, რომელშიც აცხადებს, რომ 2023 წლის 29 ივლისს კონცერტზე ყოფნისას სცენიდან ნასროლი ნივთი მოხვდა. პოლიციის დეპარტამენტს მომღერალი Cardi B არ უხსენებია, თუმცა საერთაშორისო მედიები ვარაუდობენ, რომ საჩივარი სწორედ მის წინააღმდეგაა შეტანილი.

ბოლო პერიოდია შემთხვევები, როდესაც კონცერტზე არტისტებს ფანები ნივთებს ესვრიან, ძალიან გახშირდა, რაც რიგ შემთხვევებში მომღერლების მცირედ დაზიანებასაც იწვევს. მაგალითად, დრეიკს ფანმა ელექტრონული სიგარეტი ესროლა, Bebe Rexha-ს დამსწრემ სახეში ტელეფონი გაარტყა, P!nk-ს გულშემატკივარმა გარდაცვლილი დედის ფერფლი შეაყარა, კელსი ბალერინს სიმღერის შეწყვეტა მოუწია, რადგან ფანის მიერ ნასროლი საგანი მოხვდა, ჰარი სტაილსს კი დამსწრის მიერ ნასროლი გაურკვეველი ობიექტი თვალთან ახლოს მოხვდა.

ამავე თემაზე:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...