ბოლო დროს სოციალურ ქსელებში საბავშვო წიგნების შინაარსით აღშფოთებული ადამიანების რიცხვი გაიზარდა. ჯერ იყო და ელტონ ჯონის შესახებ გამოშვებული ბროშურის გამო "ლგბტ პროპაგანდაში" მაკდონალდსი დაადანაშაულეს. ცოტა ხნის წინ სულაკაურის გამომცემლობაში "დედების სახელით" რამდენიმე ადამიანი მივარდა — ისინი გამომცემლობას შარლ პეროს ერთ-ერთი ზღაპრისა და წიგნისთვის ძილისპირული ამბები მეამბოხე გოგონებისთვის ეჩხუბნენ. ამას თან ირაკლი ღარიბაშვილის გამოსვლაც დაერთო, რომელმაც წლიური მოხსენების წარდგენისას სულაკაურის გამომცემლობა "ლგბტ პროპაგანდაში" დაადანაშაულა. ღარიბაშვილს კონკრეტული წიგნი არ უხსენებია, თუმცა, დიდი ალბათობით, ისიც შარლ პეროს ზღაპარზე საუბრობდა.

ძილისპირული ამბები მეამბოხე გოგონებისთვის ცნობილ მეცნიერ, კოსმონავტ, ლიდერ ქალებზე რეალური ისტორიებს აერთიანებს. შარლ პეროს იმ "ავადსახსენებელ" ზღაპარში ცოლის გარდაცვალების შემდეგ გაგიჟებული მეფე საკუთარ შვილზე დაქორწინებას გადაწყვეტს. საინტერესოა, როგორ უნდა მოუწამლოს ბავშვს გონება ქალთა უფლებებზე დაწერილმა წიგნმა ან როგორ არ უნდა ჰქონდეს უფროსს იმის უნარი, რომ ბავშვის კითხვაზე, შეიძლება თუ არა, მეფემ თავისი შვილი შეირთოს ცოლად, უბრალოდ უპასუხოს, რომ არა, არ შეიძლება.

რაც არ უნდა გასაოცარი იყოს, უფროსებმა საბავშვო წიგნების გააზრების ნაცვლად, მათი გამომცემლების, მთარგმნელების, ავტორებისა და მკითხველების "ლგბტ პროპაგანდაში" დადანაშაულება გადაწყვიტეს და ცენზურის იდეასაც დიდი სიამოვნებით ჩაეჭიდნენ. როგორც ჩანს, წიგნების აკრძალვა და საბჭოთა კავშირში დაბრუნება ბევრისთვის ცუდი აზრი სულაც არაა — იმ საბჭოთა კავშირში, რომელშიც სიტყვის, გამოხატვისა და ხელოვნების თავისუფლება არ არსებობდა.

რადგანაც საზოგადოების ნაწილს ყველა საბავშვო წიგნში პროპაგანდა ელანდება, დროა, ქართულ ზღაპრებსაც გადავხედოთ — ამ სტატიაში წარმოგიდგენთ 5 ქართულ ხალხურ ზღაპარს, რომელსაც შარლ პეროსთან ერთად "პროპაგანდის" გამო აკრძალავდნენ.

1. კომბლე

ყველასთვის საყვარელ კომბლეს დღეს იარაღის დამზადების, შენახვისა და ტარების პროპაგანდისთვის აკრძალავდნენ, რადგან მთავარი პერსონაჟი დღე და ღამე ზის, კომბლებს თლის და ჭერში აწყობს. რას ვასწავლით ბავშვებს?!

2. ასფურცელა

ცნობილ ზღაპარში ძმები გზას დაადგებიან და იმისთვის, რომ დამ მარტივად მიაგნოს, გზად ხახვის ფურცლებს ყრიან, ამიტომ ასფურცელას გარემოს დაბინძურების პროპაგანდაში დასდებდნენ ბრალს. ვაი და, ვინმემ ეს გენიალური ხერხი მართლა გამოიყენოს?!

3. გაუცინარი ხელმწიფე

ზღაპრის მთავარი გმირი, როგორც მიხვდებოდით, გაუცინარი ხელმწიფეა, რომლის ღიმილიც ჯერ არავის უნახავს. იმის ნაცვლად, რომ ამბავმა ბავშვებს კარგი მაგალითი მისცეს, ცხოვრებით უკმაყოფილების პროპაგანდას ეწევა. საქართველოს მოსახლეობისთვის ეს ზღაპარი ძალიან საშიშია, რადგან ქვეყანა საათივითაა აწყობილი და წყენისა და გაბრაზების მიზეზი ნამდვილად არ გვაქვს!

4. ვაჟად ქცეული ქალი

მგონი, სათაურით ყველაფერი ნათქვამია. ზღაპარში ქალი მამის ტანსაცმელს ჩაიცვამს, თავს კაცად გაასაღებს და მის ადგილას დაიწყებს მუშაობას, რითაც ცალსახად "ლგბტ პროპაგანდას" უწყობს ხელს!

5. წიქარა

ცნობილი ზღაპარში პატარა ბიჭი თავის საყვარელ ხართან, წიქარასთან ერთად, დედინაცვალს გაექცევა, სახლიდან რამდენიმე ნივთს მოიპარავს და უკან დადევნებულ ღორს ხან სავარცხელს და ხანაც სალესავს ესვრის. ეს ამბავი ქურდობისა და სხვისი ქონების დაზიანების პროპაგანდის კარგი მაგალითია, თანაც წიქარაზე ზღაპრის წაკითხვა, ვინ იცის, რამდენ ადამიანს აქცევს მოლაპარაკე ხარად? ამაზე არ გიფიქრიათ?