საპატრიარქო მაკდონალდის საბავშვო მენიუზე მედიაში გავრცელებულ ინფორმაციას განცხადებით გამოეხმაურა. ცოტა ხნის წინ, ტელეკომპანია იმედმა გაავრცელა სიუჟეტი, რომელშიც ნათქვამია, რომ მაკდონალდის "ჰეფი მილში" ერთ-ერთი საჩუქარი ცნობილი მუსიკოსის, ელტონ ჯონის შესახებ შექმნილი ბროშურაა, სადაც როგორც მისი მუსიკალური კარიერის, ასევე პირადი ცხოვრების შესახებაა მოთხრობილი.

საპატრიარქოს განცხადებით, ბროშურის გამოშვება მაკდონალდსის მხრიდან მოსახლეობის ცხოვრების წესის უგულებელყოფას ნიშნავს და მას ვერაგულ და შეფარულ საქციელს უწოდებს.

"მიგვაჩნია, რომ მსგავსი ქმედება არის ყალბი ღირებულებების პროპაგანდა, განსაკუთრებით საქართველოში, ისეთ ქვეყანაში, რომელიც თითქმის ორიათასწლოვანი ქრისტიანული, სულიერი და კულტურული მემკვიდრეობით ცხოვრობს. [...] საუბარი ჯანსაღ საკვებზე კი, რომელსაც შეფარვით სულიერი საწამლავი ერევა, არის კარგად გათვლილი მზაკვრობა", — ნათქვამია განცხადებაში.

ამ თემას მმართველი პარტია ჰომოფობიური კომენტარებით გამოეხმაურა. ოცნების დეპუტატის, ირაკლი კობახიძის თქმით, დაუშვებელია, ლგბტ პროპაგანდა ბავშვებისკენ იყოს მიმართული. ის მაკდონალდსს საკუთარი მასალების შინაარსის გადახედვისკენ მოუწოდებს.

მამუკა მდინარაძე მაკდონალდსის წიგნს "ლგბტ დოკუმენტაციას" უწოდებს და ამბობს, რომ უფლებების დაცვისა და პროპაგანდა ერთმანეთისგან გამიჯვნა აუცილებელია.

"დღეს ჩვენ ვნახეთ ამაზრზენი ფაქტი ე.წ. ჰეფი მილში ბავშვებს სასაჩუქრე პაკეტში სთავაზობენ და აწვდიან ლგბტ პროპაგანდის და არა უფლებების დაცვას. არ სჭირდება ბავშვს უფლებების დაცვის სწავლა 2, 3, 7 და 10 წლის ასაკში", — აცხადებს მდინარაძე.

ხელისუფლებისგან განსხვავებული პოზიცია აქვს ოპოზიციას. დამოუკიდებელი დეპუტატის, თეონა აქუბარდიას განცხადებით მმართველი პარტია პროპაგანდას კონსტიტუციური უფლების დაცვას ეძახის. ნაციონალური მოძრაობის წევრი, ლევან ბეჟაშვილი კი ამბობს, რომ ოცნება ამ თემას პოლიტიკური სპეკულირებისთვის იყენებს.

რესპუბლიკური პარტიის ლიდერის, ხათუნა სამნიძის თქმით, ყველა ადამიანი თანასწორია და თუ ეს ბავშვებს პატარა ასაკიდანვე ეცოდინებათ, უკეთესი იქნება.

"ყველას აქვს უფლება იყოს ბედნიერი და თუ მისი არჩევანია, რომ ჰყავდეს იმავე სქესის პარტნიორი, მე ამაში ვერანაირ პრობლემას ვერ ვხედავ. ვერც იმაში, რომ ასეთი ცოდნა და ინფორმაცია, რომ ყველა თანასწორი ვართ ამ ქვეყანაში და ამ დედამიწაზე, ჰქონდეთ ბავშვებსაც", — აღნიშნავს სამნიძე.

76 წლის ლეგენდარულმა ბრიტანელმა მუსიკოსმა ელტონ ჯონმა პირველი ალბომი 1970 წელს გამოუშვა და პოპულარობას უკვე 50 წელზე მეტია ინარჩუნებს. ის მსოფლიოში ერთ-ერთი ყველაზე მაღალანაზღაურებადი მომღერალია.

ელტონ ჯონმა და მისმა ქმარმა დევიდ ფერნიშმა ერთმანეთი 1993 წელს გაიცნეს. წყვილმა 2014 წელს იქორწინა. ელტონს და დევიდს ერთად ორი შვილიც ჰყავთ: ელაიჯა და ზაქარი.