რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებლისა და ჟურნალისტის ნიკა გვარამიას შეწყალების აქტს სალომე ზურაბიშვილმა ხელი გუშინ, 22 ივნისს მოაწერა.

  • ადგილობრივი ავტორიტეტული არასამთავრობო ორგანიზაციები აცხადებდნენ, რომ გვარამიას მიმართ გამოტანილი განაჩენი უკანონო და პოლიტიკურად მოტივირებულია.
  • პრეზიდენტს არაერთხელ მოუწოდეს, გვარამიას შეწყალებისკენ, თუმცა ის მუდმივად ხაზს უსვამდა, რომ დისკრეციულ უფლებამოსილებას საჭიროებისამებრ გამოიყენებს და არა ზეწოლით.
  • გუშინ კი მან განაცხადა, რომ ხელი მოაწერა შეწყალების აქტს და გადაწყვეტილება მას შემდეგ მიიღო, რაც ამოიწურა ყველა სამართლებრივი საფეხური, როცა სასამართლომ არ მიიღო განსახილველად საკასაციო სარჩელი.

შარლ მიშელი მიესალმება სალომე ზურაბიშვილის გადაწყვეტილებას ნიკა გვარამიას შესახებ და ამბობს, რომ ეს საქართველოს დეპოლარიზაციისკენ გადადგმული არსებითი ნაბიჯია.

  • ასევე, პოზიტიურად შეაფასა დეოლიგარქიზაციის კანონის მესამე მოსმენით არმიღებაზე ქართული ოცნების გადაწყვეტილება.
  • "სისტემურ მიდგომაზე ფოკუსირება საჭიროა ვენეციის კომისიის რეკომენდაციების შესაბამისად".
  • ბოლოს კი წერს: "საქართველოს მომავალი ევროკავშირშია".

ნიკა გვარამიას წინააღმდეგ პროკურატურამ გამოძიება 2019 წლის 20 ივლისს დაიწყო.

  • საქმე ეხებოდა ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ.
  • 2022 წლის 16 მაისს სასამართლომ გვარამიას 3 წლითა და 6 თვით პატიმრობა მიუსაჯა.
  • 2023 წლის 2 ნოემბერს სააპელაციომ ის პატიმრობაში დატოვა, 19 ივნისს კი უზენაესმა დაუშვებლად ცნო გვარამიასა და კახაბერ დამენიას ადვოკატების საჩივარი.