სულ რამდენიმე დღის წინ შედგა ნეტფლიქსის ახალი მძაფრსიუჟეტიანი ფილმის პრემიერა, რომელსაც ქართველი კინომოყვარულები განსაკუთრებით ელოდებოდნენ. საქმე ისაა, რომ Extraction 2-ში კრის ჰემსვორტის მხარდამხარ ქართველი მსახიობები მონაწილეობენ: თინათინ დალაქიშვილი, თორნიკე გოგრიჭიანი, დათო ბახტაძე, თორნიკე ბზიავა, ანდრო ჯაფარიძე, ირაკლი კვირიკაძე და სხვები.

დიდი მოლოდინის მიუხედავად, როგორც ჩანს, ფილმით კმაყოფილი ყველა არ დარჩენილა. გავლენიანი ბრიტანული გამოცემა The Guardian, რომელიც გულწრფელი მიმოხილვებით გამოირჩევა ხოლმე, ნეტფლიქსის ახალ ფილმს 5-დან მხოლოდ 1 ვარსკვლავით აფასებს. მიმომხილველი პიტერ ბრედშოუ წერს, რომ Extraction 2 სხვა არაფერია, თუ არა "ფულის მახე".

"სცენარისტი ჯო რუსო და რეჟისორი სემ ჰარგრეივი მორიგი მსუყე ექშენის შესაქმნელად გაერთიანდნენ", — წერს მიმომხილველი, — "ჰემსვორტი ისევ ტაილერ რეიკს ასრულებს, დიდსულოვან დაქირავებულ მებრძოლს, რომელიც წინა ფილმის დასასრულს, რატომღაც, მკვდრად ჩავთვალეთ. თუმცა, აღმოჩნდა, რომ, უბრალოდ, ძალიან, ძალიან ცუდად ყოფილა.

"ფილმის დასაწყისში უჩვეულოდ ზერელე კადრებით ვხედავთ, რომ რეიკის ვითომ-გვამს პოულობენ და დუბაის მდიდრულ და გასაიდუმლოებულ საავადმყოფოში სამედიცინო დახმარებას უწევენ, მერე კი ძველებურად ახოვანი ტაილერი გადაწყვეტს, თავისი ყოფილი ცოლის და და მისი შვილები დაიხსნას მოძალადე ქმრისგან, რომელიც ბანდის მეთაურია (იმ ყოფილ ცოლს სერიოზული ფული უნდა ჰქონოდა, ამხელა ოპერაცია რომ დააფინანსა).

"[...] Extraction-ის პირველი ნაწილი გასართობად გამოდგებოდა, მაგრამ ეს ფილმი, ცინიკურად, მხოლოდ ფულის მახეა".

თუმცა, მაყურებლების უმეტესობა The Guardian-ის მიმომხილველივით სულაც არ ფიქრობს. კინოფილმების მონაცემთა ინტერნეტ ბაზაზე (IMDb) Extraction 2-ს, 29 ათას შეფასებაზე დაყრდნობით, 10-დან 7,2 ქულა აქვს. ხოლო კინომოყვარულების პლატფორმა Rotten Tomatoes-ის ათასზე მეტი მომხმარებლიდან 89 პროცენტმა ფილმს დადებითი შეფასება მისცა.

Extraction 2-ში ქართველი მსახიობების მონაწილეობის შესახებ ჯერ კიდევ გასული წლის გაზაფხულზე შევიტყვეთ. მანამდე კი ისიც ვიცოდით, რომ ფილმში ქართველ ჰალკად წოდებულ მკლავჭიდელს, ლევან საგინაშვილს, ვიხილავდით.

აღსანიშნავია, რომ დათო ბახტაძისთვის ჰოლივუდურ ბლოკბასტერში მონაწილეობა უცხო გამოცდილება არ არის — მსახიობმა რამდენიმე წლის წინ ბენ-ჰურის ახალ ეკრანიზაციაში ითამაშა.

ფოტო: Netflix

Extraction 2-ის დიდი ნაწილი პრაღაში გადაიღეს. მართალია, თავიდან გადაღებები ავსტრალიაში იგეგმებოდა, თუმცა, კორონავირუსის პანდემიის გამო გეგმები შეიცვალა.

რაც შეეხება Extraction-ის პირველ ფილმს, ენდი პარკსის გრაფიკულ რომანზე დაფუძნებული კინოსურათი 2020 წელს გამოვიდა და 99 მილიონზე მეტი ნახვით ნეტფლიქსის ყველაზე ყურებადი ორიგინალური ნამუშევარი გახდა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...