ამის შესახებ მათ მაუწყებელთან 7 ივნისს, გვიან ღამით, ისაუბრეს.

რატომ არის მნიშვნელოვანი: მე-8 დღეა, ჭიათურაში 3000-ზე მეტი მაღაროელი და მათი ოჯახის წევრები მძიმე სამუშაო პირობების გაუმჯობესების მოთხოვნით საპროტესტო აქციებს მართავენ.

  • საუბარია ისეთი ბაზისური შრომითი უფლებების დაცვაზე, როგორებიცაა: ხელფასის ზრდა ინფლაციის გათვალისწინებით, შრომის უსაფრთხოება, აღჭურვილობისა და სპეცტანსაცმლის შეცვლა, სანგრების განიავება, საშხაპეების მოწყობა, ახალი, მეტად დატვირთული და ნაკლებად ანაზღაურებული სამუშაო გრაფიკიდან, ძველ განრიგზე დაბრუნება.
  • არასამთავრობო ორგანიზაციების შეფასებით, ჯორჯიან მანგანეზის მხრიდან შრომითი დარღვევები განსაკუთრებით საყურადღებოა, რადგან 2017 წლიდან კომპანიას სახელმწიფოს სპეციალური მმართველი განაგებს.

დეტალები: გაფიცული მაღაროელების თქმით, მათ პროტესტის უკიდურეს ფორმას მას შემდეგ მიმართეს, რაც ჯორჯიან მანგანეზმა მოთხოვნების დაკმაყოფილებაზე უარი უთხრა.

  • "ამ საქმეს შევეწირები და თქვენ ასეთ შეურაცხყოფას არ გაგატანინებთ. მინდა, ვთხოვო მთავრობას, პირადად პრემიერს, გამოუშვას შესაბამისი სამსახურები, შესაბამისად შეისწავლოს მათი საქმიანობა", — ამბობს ერთ-ერთი გაფიცული მაუწყებელთან.

კომპანიაში აცხადებენ, რომ ფეროშენადნობის ბაზარზე კრიზისის გამო, რამაც პროდუქციაზე მოთხოვნის შემცირება და ფასების მკვეთრი ვარდნა გამოიწვია, წელს პროდუქცია ექსპორტზე არ გაუტანიათ.

  • ამბობენ, რომ თანამშრომლებს შეცვლილ სამუშაო პირობას სთავაზობენ, რათა საქმიანობა არ შეჩერდეს და ჭიათურის 3 382 თანამშრომელი უმუშევარი არ დარჩეს.
  • როგორც აღნიშნავენ, ახალ სამუშაო გრაფიკზე გადასვლა გულისხმობს ადმინისტრაციული ხარჯების შემცირებას;
  • ორცვლიანი 12-საათიანი სამუშაო პირობებიდან სამცვლიან 8-საათიან სამუშაო პირობებზე გადასვლას.
  • ასევე, მათივე თქმით, უცვლელი რჩება თვის მანძილზე თანამშრომლების ხელფასი, დასვენებისა და სამუშაო საათები.