რა მოხდა: 6 ივნისს ოკუპანტებმა უკრაინაში ერთ-ერთი ყველაზე დიდი ჰიდროელექტროსადგურის, კახოვკის, კაშხალი ააფეთქეს.

  • მდინარე დნეპრზე მდებარე ჰესის აფეთქების შედეგად ათობით დასახლება დაიტბორა, ათასობით მშვიდობიანი მოქალაქე კი ევაკუირებულია.
  • პირველადი მონაცემებით, წყალდიდობას, სულ მცირე, 3 ადამიანი ემსხვერპლა.
  • უკრაინა და საერთაშორისო საზოგადოება მომხდარში რუსეთს ადანაშაულებს და ჰესის აფეთქებას ომის დანაშაულს უწოდებს, რუსეთი კი ბრალდებას უარყოფს და ყველაფერს, ტრადიციულად, უკრაინას უკავშირებს.

დეტალები: BBC-ის რუსული ბიუროს ცნობით, რუსეთის წარმომადგენლებმა ჰააგის საერთაშორისო სასამართლოს მიმართეს და უკრაინას კაშხლის საარტილერიო დაბომბვით განადგურებაში დასდეს ბრალი.

  • ოკუპანტები, რომლებმაც სრულმასშტაბიანი ომის დასაწყისშივე დაიკავეს კახოვკის ჰიდროელექტროსადგური, ამტკიცებენ, რომ უკრაინამ დაბომბვამდე წყალსაცავში წყლის დონე მაქსიმუმამდე აწია.
  • "კიევის რეჟიმმა არა მხოლოდ მასიური საარტილერიო დარტყმები განახორციელა კაშხალზე 6 ივნისის ღამეს, არამედ მიზანმიმართულად აწია წყლის დონე კახოვკის წყალსაცავში კრიტიკულ ნიშნულამდე", — ირწმუნება რუსი დიპლომატი, ალექსანდრე შულგინი.
  • ჰააგის სისხლის სამართლის საერთაშორისო სასამართლოს 6 ივნისს მიმართა უკრაინამაც.
  • მანამდე პრეზიდენტმა, ვოლოდიმირ ზელენსკიმ თქვა, რომ ასეთი ძლიერი სტრუქტურის განადგურება არტილერიით გარედან შეუძლებელი იყო და ამ მასშტაბის აფეთქება შიგნიდან უნდა მომხდარიყო.