რა მოხდა: 4 ივნისს ბათუმში მდებარე რესტორნის ყოფილმა თანამშრომელმა სოციალურ ქსელში გამოაქვეყნა ვიდეო, სადაც ჩანს, რომ რეტროს მეპატრონე, თეიმურაზ ვარშანიძე, მიმტანზე ძალადობს.

  • "წესებს დავადგენთ, ის იქნება. არ გაწყობს, წადი. [...] თუ ის არ უნდა შეასრულოთ, რასაც ჩვენ, კომპანია, გეუბნებათ, ახლავე ადექით. სამუშაოზე მიდიხართ, როგორც მე მოგთხოვთ, ისე უნდა გააკეთოთ. როგორც თქვენ მომთხოვთ, ისე კი არ უნდა გავაკეთო", — ეუბნება ვარშანიძე დასაქმებულებს, რის შემდეგაც მიმტანი პასუხობს, რომ მასთან სამართალს ვერ მიაღწია.
  • სწორედ ამ კომუნიკაციის შემდეგ რესტორნის მფლობელი მიმტანს სცემს.
  • გავრცელებულ კადრებში ჩანს ფიზიკური დაპირისპირება, ისმის ყვირილისა და მსხვრევის ხმა.
  • როგორც On.ge-ს შსს-ში განუცხადეს, თეიმურაზ ვარშანიძე 126-ე მუხლითაა დაკავებული, რაც ძალადობას გულისხმობს.

დეტალები: რეტრო დილიდან დაკეტილია. დაწესებულებაში შრომის ინსპექცია შევიდა, რომელიც დასაქმებულების უფლებების დარღვევას შეისწავლის.

  • მომხდარს გამოეხმაურა ბათუმში მდებარე რესტორანი, ფშაური, რომელიც რეტროდან წამოსულ თანამშრომლებს დასაქმებას სთავაზობს, თუმცა შეზღუდული რაოდენობით.
  • "ფშაური გმობს ბოლო პერიოდში საქართველოში გახშირებულ არასათანადო და ძალადობრივ მოპყრობას თანამშრომლების მიმართ, რაც ეწინააღმდეგება და ლახავს ადამიანის ფუნდამენტურ უფლებებს", — ნათქვამია განცხადებაში.

რეტროს ყოფილი მენეჯერის თქმით, რესტორნის მეპატრონისგან სამართლიანი და ადამიანური მოპყრობა არასდროს ჰქონიათ, თუმცა სიტუაცია, განსაკუთრებით, მას შემდეგ დაიძაბა, რაც ქვეყანაში რუსების შემოდინება დაიწყო.

  • "მალევე მოიყვანეს რუსი მიმტანები, რუსი დიზაინერები და რუსი ფსევდო PR-ები, რომლებმაც არც ქართული იცოდნენ, არც ინგლისური და გვიქმნიდნენ ტოქსიკურ სამუშაო გარემოს. მათი აყვანიდან მალევე დაიწყო ამ ხალხის უპირატესად წარმოჩენა და გამუდმებით ჩვენი დაკნინება", — წერს მარია ზოიძე.
  • თავად ზოიძემ მენეჯერის პოზიცია მას შემდეგ დატოვა, რაც, მისივე თქმით, ვარშანიძემ უამრავ სტუმართან ერთად შეურაცხმყოფელი და ღირსების შემლახავი სიტყვებით მიმართა.