რატომ არის მნიშვნელოვანი: 26 მაისს საქართველოში დამოუკიდებლობის დღე აღინიშნება.

  • ეს დღე უკვე მოგვილოცეს საერთაშორისო პარტნიორებმა, მეგობარმა სახელმწიფოებმა და ორგანიზაციებმა.
  • საქართველოს დამოუკიდებლობის დღეს ულოცავენ მეზობელი ქვეყნებიც.

თურქეთის საგარეო საქმეთა სამინისტრომ დამოუკიდებლობის დღის მისალოცი პოსტი გამოაქვეყნა.

  • "ჩვენ აღვნიშნავთ ჩვენი მეგობრისა და მეზობლის, საქართველოს დამოუკიდებლობის დღეს. გაუმარჯოს საქართველოს!"
  • გარდა ამისა, დამოუკიდებლობის დღის აღსანიშნად საქართველოს დროშის ფერებში განათდა სტამბოლის სულთან მეჰმედის ხიდი.

სომხეთის პრემიერმინისტრი, ნიკოლ ფაშინიანი დამოუკიდებლობის დღეს ულოცავს საქართველოს პრეზიდენტსა და პრემიერმინისტრს.

  • სალომე ზურაბიშვილისადმი მისალოც წერილში ფაშინიანი ამბობს, რომ საქართველოსთან ურთიერთსასარგებლო და კეთილმეზობლური ურთიერთობების გაღრმავება მათი საგარეო პოლიტიკის ერთ-ერთი პრიორიტეტია.
  • "გისურვებთ ჯანმრთელობას და ნაყოფიერ საქმიანობას, ხოლო საქართველოს მეგობარ ხალხს — მშვიდობასა და წინსვლას", – ნათქვამია მისალოც გზავნილში.
  • ირაკლი ღარიბაშვილისადმი გაგზავნილ წერილში კი ფაშინიანი წერს, რომ სომხეთი საქართველოსთვის საიმედო მეგობარი და მეზობელია და ასეთად დარჩება.

აზერბაიჯანის პრეზიდენტმა, ასევე, გაავრცელა მილოცვა საქართველოს პრეზიდენტისა და ქართველი ხალხის სახელზე.

  • "ასეთ მნიშვნელოვან დღესასწაულზე გისურვებთ ჯანმრთელობას, ბედნიერებას, წარმატებებს თქვენს საქმიანობაში, ხოლო მეგობარ ქართველ ხალხს – მშვიდობასა და კეთილდღეობას", — ნათქვამია ალიევის მილოცვაში.
  • გარდა ამისა, ბაქოში საქართველოს დროშის ფერებით განათდა ჰეიდარ ალიევის ცენტრი.