საქართველოს სახელმწიფო მინისტრმა ევროატლანტიკურ სტრუქტურებში ინტეგრაციის საკითხებში დავით ბაქრაძემ დღეს ჟურნალისტებს განუცხადა, რომ საქართველოს მთავრობის მიერ მაღალი ხარისხით შესრულებული სამუშაოს გათვალისწინებით, ევროპის ლიდერებმა საქართველოსთვის ვიზალიბერალიზაციის მინიჭებას მხარი უნდა დაუჭირონ:

"გვაქვს მოლოდინი, რომ იმ მაღალი ხარისხით შესრულებული სამუშაოს გათვალისწინებით, ეს პროცესი დადებითად გადაწყდება და სწორ და პასუხისმგებლიან გადაწყვეტილებას მიიღებენ ევროპელი ლიდერები".

დავით ბაქრაძე გამოეხმაურა საფრანგეთის და გერმანიის მხრიდან გაჟღერებულ სურვილს საქართველოსთვის ვიზალიბერალიზაციის შეჩერების მექანიზმის ამუშავებასთან დაკავშირებით:

"ბოლო ორი დღის პუბლიკაციებში ვხედავთ, რომ არსებობენ ინტერესები, რომელთაც განსხვავებული პოზიციები აქვთ, თუმცა, საქართველოსთან მიმართებაში, სწორედ იქიდან გამომდინარე, რომ არ არის კითხვის ნიშანი, რომელიც ჩვენ დავტოვეთ, ვიზალიბერალიზაციის სამოქმედო გეგმის შესრულების კუთხით, აქედან გამომდინარე შევქმენით ის შესაძლებლობა, რომ პასუხისმგებლიანმა მთავრობებმა მიიღონ გადაწყვეტილება სწორედ ევროპის თანმიმდევრული პოლიტიკიდან გამომდინარე".

საფრანგეთი და გერმანია საქართველოსთვის ვიზალიბერალიზაციის მინიჭებას მათ ქვეყნებში კრიმინალის ზრდის თავიდან არიდების მიზეზით ეწინააღმდეგებიან (ამის შესახებ ვრცელი პუბლიკაცია გამოქვეყნდა გერმანულ გაზეთში Die Welt).

საქართველოს პრეზიდენტი გიორგი მარგველაშვილი სტრასბურგშია და დღეს ის ევროპარლამენტში უვიზო მიმოსვლის საკითხზე ისაუბრებს.