ლეგენდარული მომღერალი და როკ-ენ-როლის დედოფლად წოდებული ტინა ტერნერი ხანგრძლივი ავადმყოფობის შემდეგ 83 წლის ასაკში გარდაიცვალა. ინფორმაციას მუსიკოსის ოფიციალური წარმომადგენელი ბერნარდ დოერთი ავრცელებს.

"მისი სახით მსოფლიომ მუსიკის ლეგენდა და სამაგალითო პიროვნება დაკარგა", — წერს დოერთი.

ტერნერს ჯანმრთელობასთან დაკავშირებული პრობლემები წლების განმავლობაში ჰქონდა. მუსიკოსს 2016 წელს სიმსივნის დიაგნოზი დაუსვეს, 2017 წელს კი თირკმელი გადაუნერგეს.

მსოფლიოში აღიარებულმა ვარსკვლავმა თავისი ბოლო სოლო ალბომის გამოშვების მომდევნო წელს, 2000-ში, განაცხადა, რომ კარიერას ასრულებდა. თუმცა, მოგვიანებით, 2008 წელს, იგი სცენას მაინც დაუბრუნდა და ჯერ ბიონსესთან ერთად იმღერა გრემის დაჯილდოებაზე, მერე კი თავისი 50-წლიანი კარიერის აღსანიშნავად ტურნე წამოიწყო.

აი, კარიერაში წარმატების მიღწევამდე კი ადვილი გზა არ გამოუვლია. 1939 წელს დაბადებულმა ტერნერმა სიმღერა ჯერ ადგილობრივი ეკლესიის გუნდში დაიწყო, მერე კი გეზი დიდი სცენებისკენ აიღო და ბევრ წინააღმდეგობასაც წააწყდა.

"საშინელი ცხოვრება მქონდა", — იხსენებდა მუსიკოსი რამდენიმე წლის უკან, — "უბრალოდ, გზა განვაგრძე. გზას აგრძელებ და იმედს იტოვებ, რომ რაღაც მოხდება".

"რაღაც" კი ტერნერის ცხოვრებაში ნამდვილად მოხდა; 100 მილიონზე მეტი გაყიდული ჩანაწერით მომღერალი ყველა დროის ერთ-ერთ ყველაზე პოპულარულ შემსრულებლად მიიჩნევა. მას მიღებული აქვს გრემის 12 ჯილდო. ამასთან, ტერნერი, რომელიც Rolling Stone-ის გარეკანზე გამოჩენილი პირველი შავკანიანი და პირველი ქალი შემსრულებელია, ამავე ჟურნალმა ყველა დროის 100 საუკეთესო მომღერალს შორისაც დაასახელა. მუსიკოსის სახელობის ვარსკვლავი ჰოლივუდის დიდების ხეივანშიცაა. თუმცა, ტერნერისთვის კარიერულ მიღწევებზე მნიშვნელოვანი სხვა რამ იყო.

"ნამდვილი და ხანგრძლივი ბედნიერება ურყევი, იმედიანი სულის ქონას მოაქვს — სულისა, რომელიც ყველაფრის მიუხედავად მაინც ანათებს", — განაცხადა ტერნერმა 2020 წელს, — "აი, ამას მივაღწიე ცხოვრებაში. და ჩემი ყველაზე დიდი სურვილიც ისაა, სხვებს ჭეშმარიტი ბედნიერების პოვნაში დავეხმარო".