კალიფორნიელი კაცი, რომელიც იხვის ჭუკებს გზის გადაკვეთაში ეხმარებოდა, ავტომობილმა გაიტანა და გარდაიცვალა. 41 წლის კეისი რივერამ საკუთარი ავტომობილი გზასთან დატოვა და იხვის ჭუკების დახმარება გადაწყვიტა, რომლებიც ქუჩას ვერ კვეთდნენ. სწორედ ამ დროს რივერას გზაზე მომავალი ავტომობილი დაეჯახა, რაც მისთვის სასიკვდილო აღმოჩნდა.

"კაცი ცდილობდა, რომ რამდენიმე იხვის ჭუკს გზის გადაკვეთაში დახმარებოდა, რომლებიც გზაჯვარედინზე იყვნენ. სწორედ ამის გამო აღმოჩნდა რივერა გზაჯვარედინზე, როცა აღმოსავლეთიდან მომავალი მძღოლი დაეჯახა", — ვკითხულობთ პოლიციის განცხადებაში.

ფოტო: KCRA

"იმ მომენტში ყველა ვამბობდით, რომ კაცის მხრიდან ეს ძალიან კარგი საქციელი იყო, უცებ კი ავტომობილი დაეჯახა", — ამბობს ავტოავარიის თვითმხილველი. შეჯახების ადგილას ადგილობრივებმა ყვავილები და რეზინის იხვები დატოვეს, რითაც გარდაცვლილის მიმართ პატივისცემა გამოხატეს.

როგორც მოგვიანებით გაირკვა, რივერას თავისი შვილები ცურვის გაკვეთილიდან სახლში მიჰყავდა, როცა გზად იხვის ჭუკები შენიშნა. ადგილობრივებმა რივერას ოჯახის დასახმარებლად თანხის შეგროვება უკვე დაიწყეს. პოლიციის განცხადებით, ჯერჯერობით არავინ დაუკავებიათ და ინციდენტი ისევ გამოძიების პროცესშია.