დეტალები: ვიაჩესლავ გლადკოვი ისევ იმეორებს, რომ ტერიტორიაზე "უკრაინული დივერსიული ჯგუფუა შეჭრილი" და ამბობს, რომ გრაივორონსკის რაიონში ვითარება დაძაბულია.

• "მოსახლეობის უმეტესობამ ტერიტორია დატოვა. ვისაც შესაძლებლობა არ აქვს, ვეხმარებით ტრანსპორტით, ვისაც აქვთ — თავისი ტრანსპორტით მიდიან".
• მედუზა წერს, რომ ხელისუფლებას ევაკუაცია ოფიციალურად მართლაც არ აქვს გამოცხადებული, თუმცა მოქალაქეები ბელგოროდიდან გაქცევას ცდილობენ.
• სოციალურ ქსელში ვრცელდება ვიდეოები, რომ ქალაქის გასავლელში საცობია შექმნილი, თუმცა სახელწიფო მედია ცდილობს, ეს ვითარება არ შეიმჩნიოს.

ბოლო სიახლეები: ბელგოროდის რაიონში კონტრტერორისტული ოპერაციის რეჟიმი ამოქმედდა.

• ეს რეჟიმი არაერთ შეზღუდვას გულისხმობს, მათ შორის მოქალაქეთა ვინაობის დამადასტურებელი დოკუმენტების შემოწმებას, სახიფათო მრეწველობისა და ორგანიზაციების საქმიანობის შეჩერებას, რომლებიც იყენებენ ფეთქებად, რადიოაქტიურ, ქიმიურად და ბიოლოგიურად საშიშ ნივთიერებებს.
• რუსული ტელეგრამარხი ბაზა ირწმუნება, რომ ბრძოლები "დივერსანტებთან" მიმდინარეობს გრაივორონსკის რაიონის ორ სოფელში — კოზინკასა და გლოტოვოში.
• მათივე ინფორმაციით, სროლების გამო მოსახლეობის ევაკუაცია ჯერ ვერ ხერხდება, ისინი სარდაფებში იმალებიან.
• ადგილობრივები ავრცელებენ ვიდეოებს, როგორ ურეკავენ ტელეფონზე სამხედრო კომისარიატიდან და ბომბსაცავებში ჩასვლაზე აფრთხილებენ.
• ბოლო მონაცემებით, თავდასხმის დროს დაშავდა რვა ადგილობრივი.
• გარდა ამისა, უკრაინის მთავარი სადაზვერვო სამმართველოს პრესსპიკერმა, ანდრეი იუსოვის თქვა, რომ ბელგოროდიდან რუსული ბირთვული მარაგის ევაკუაცია მიმდინარეობს.
• ბაზა და SHOT-ის ტელეგრამ არხები ავრცელებენ ინფორმაციას, რომ გრაივორონსკის რაიონში ბრძოლების დროს 39 "დივერსანტი დაიღუპა, კიდევ 5 კი ტყვედ აიყვანეს.

რა მოხდა: 22 მაისს, დილით, რუსეთის მოხალისეთა კორპუსის მებრძოლებმა გამოაქვეყნეს ვიდეო ბრიანსკისა და ბელგოროდის ოლქებიდან — განაცხადეს, რომ გადაკვეთეს რუსეთის საზღვარი და "მალე ქვეყანა თავისუფალი იქნება".

• ხოლო რუსეთის თავისუფლების ლეგიონმა, რომელიც უკრაინის მხარეს იბრძვის, ჩაწერა ვიდეო და მოუწოდა თანამოქალაქეებს, იბრძოლონ პუტინისგან ქვეყნის გასათავისუფლებლად.
• ამას მომდევნო ვიდეოც მოჰყვა, რომელშიც ლეგიონის წევრებმა რუსეთის საზღვრისპირა მაცხოვრებლებს მიმართეს, დარჩნენ სახლში და მათ წინააღმდეგობა არ გაუწიონ.
• პარალელურად ვრცელდებოდა ადგილობრივების კადრები, რომელიც ბელგოროდში აფეთქებებს და სირენების ხმას ასახავდა.
• მოგვიანებით კი ლეგიონმა ბელგოროდის ოლქის რამდენიმე დასახლების გათავისუფლებაზე განაცხადა.
• გაავრცელეს ფოტოებიც, სადაც ხიდზე გაფენილი "თავისუფალი რუსეთის" ალტერნატიული დროშა ჩანს, რომელზეც წითელი ფერი არ არის.

რატომ არის მნიშვნელოვანი: ბელგოროდში მიმდინარე მოვლენებმა მოვლენებმა რუსეთში პანიკა და სრული გაურკვევლობა გამოიწვია — ბელგოროდის მაცხოვრებლები ბომბსაცავების არარსებობაზე ჩივიან.

• აგრესორი ქვეყანა, რომელიც სხვის ტერიტორიაზე აწარმოებდა საბრძოლო მოქმედებებს, ახლა ძალებს ბელოგორდისკენ გზავნის და ამ რეგიონს უწოდებს "სპეციალური სამხედრო ოპერაციის ზონას".
• ინტერნეტმომხმარებლები ხუმრობენ, რომ მალე რუსეთს ბელგოროდის სახალხო რესპუბლიკა გამოეყოფა.
• რა თქმა უნდა, რუსეთმა მომხდარში "უკრაინის შეიარაღებული ძალების სადაზვერვო-დივერსიული ჯგუფი" დაადანაშაულა, თუმცა უკრაინის დაზვერვამ ბრალდებები უარყო.
• ვლადიმერ პუტინის პრესსპიკერი ამტკიცებდა, თითქოს დივერსიის მიზანი იყო "ბახმუტის მიმართულებიდან ყურადღების გადატანა, უკრაინული მხარის მიერ არტემოვსკის დაკარგვის პოლიტიკური ეფექტის მინიმუმამდე შემცირება".
• თუმცა უკრაინის პრეზიდენტის ადმინისტრაციის უფროსმა მრჩეველმა დაწერა, რომ ამასთან პირდაპირი კავშირი არ აქვთ, მაგრამ ინტერესით ადევნებენ თვალს მიმდინარე მოვლენებს.
• სანამ კრემლი ახალი მესიჯბოქსის შემუშავებას ცდილობს, ქალაქში აფეთქებების ხმა ისევ ისმის.