ამის შესახებ ნაციონალური მოძრაობის ფრაქციის წევრებმა გამართულ ბრიფინგზე ისაუბრეს.

რატომ არის მნიშვნელოვანი: ლევან ბეჟაშვილის განმარტებით, კანონით დადგენილი შეზღუდვები გავრცელდება ყველა იმ ფიზიკურ და იურიდიულ პირზე, რომელიც საქართველოსა და უკრაინის ტერიტორიებს ოკუპაციასა და სამხედრო აგრესიას ახორციელებს.

  • ასევე, იმ იურიდიულ და ფიზიკურ პირებზე, რომლებიც თანამშრომლობენ ასეთ კომპანიებთან, მათ შორის, საუბარია საქართველოს ფიზიკურ და იურიდიულ პირებზეც.
  • გარდა ამისა, კანონის თანახმად, იმ ქართულ და საერთაშორისო კომპანიებს, რომლებიც სანქცირებულები არიან, სახელმწიფო ბიუჯეტიდან დაფინანსება და ტენდერებში მონაწილეობა აეკრძალებათ.
  • "ერთი სიტყვით, ეს კანონპროექტი ეხება ყველა ფიზიკურ და იურიდიულ პირს, რომელიც, ერთი მხრივ, საქართველოს წინააღმდეგ ოკუპაციის არაღიარების პოლიტიკას მისდევენ, ასევე ის პირები, რომლებიც უკრაინასთან მიმართებით ჩართულნი არიან სამხედრო მრეწველობაში, არ აღიარებენ უკრაინისა და საქართველოს ტერიტორიულ მთლიანობას", — თქვა ბეჟაშვილმა.

დეტალები: ფრაქციის კიდევ ერთი წევრის, თინა ბოკუჩავას განცხადებით, ენმ-მა შესაბამისი კანონპროექტი ჯერ კიდევ გასულ წელს დააინიცირა და ნაცვლად იმისა, რომ უმრავლესობას ის დაჩქარებული წესით განეხილა, ეს პროცესი გაყინეს.

  • რუსულმა ოცნებამ შემოუშვა სერგეი გავრილოვი, თავის დროზე, რომელმაც საქართველოს მიმართა იმ სკამიდან, საიდანაც საქართველოს პირველმა პრეზიდენტმა ქვეყნის დამოუკიდებლობის აღდგენა გამოაცხადა, მათ შემოუშვეს რუსი პროპაგანდისტი პოზნერი, როდესაც მთელი ქვეყანა დახურული იყო და ადამიანები ულუკმაპუროდ იყო დარჩენილი პანდემიის დროს".
  • "შემოუშვეს ახლა უკვე ლავროვის ოჯახის წევრები, რომლებიც არიან საერთაშორისოდ სანქცირებული პირები, რომლებისთვისაც დაკეტილია მთელი თავისუფალი სამყარო. ვინ იქნება შემდეგი ამ ხელისუფლების პირობებში? თავად ლავროვი?"
  • ბოკუჩავას თქმით, ამ ხელისუფლების პირობებში, არ არსებობს არანაირი გარანტია, რომ საქართველოს ტერიტორიაზე სანქცირებული პირები არ შემოვლენ.