შრომისმოყვარე, მუდმივად ახალი აღმოჩენების ძიებაში მყოფი ახალგაზრდებისთვის საქართველოს ბანკის ინიციატივით და კომაროვის სკოლასთან თანამშრომლობით STEM სკოლაში სასწავლო პროცესი აქტიურად მიმდინარეობს.

STEM (მათემატიკის, ინჟინერიის, ტექნოლოგიებისა და საბუნებისმეტყველო მეცნიერებების) მიმართულებით ხარისხიან განათლებაზე ხელმისაწვდომობის ზრდის მიზნით საქართველოს ბანკისა და კომაროვის სკოლის მიერ შექმნილი პროექტი დღეს 200 მოსწავლეს აერთიანებს, რომელთაგან რეგიონში მცხოვრებ 63 საუკეთესო შედეგის მქონე ახალგაზრდას ბანკი სკოლაში სწავლას სრულად უფინანსებს.

საქართველოს ბანკის სტიპენდიატთა შორისაა ნოდარ დუმბაძის სახელობის ოზურგეთის მეორე საჯარო სკოლის მერვე კლასის მოსწავლე, თათია სალუქვაძე, რომელიც STEM სკოლაში მიღებულ შთაბეჭდილებებს გვიზიარებს.

როგორც გვიყვება, მათემატიკა და საბუნებისმეტყველო მეცნიერებები მისთვის ყოველთვის ინტერესის საგანს წარმოადგენდა. როგორც კი ამ პროექტის შესახებ სოციალური ქსელების მეშვეობით გაიგო, მაშინვე გადაწყვიტა, საკუთარი შესაძლებლობები გამოეცადა, კიდევ უფრო მეტად გაეღრმავებინა სკოლაში მიღებული ცოდნა და განევითარებინა პრაქტიკული უნარები.

"STEM სკოლაში სწავლის გადაწყვეტილება ძალიან მარტივად მივიღე - სულ მაინტერესებდა მათემატიკა და საბუნებისმეტყველო მეცნიერებები, ამასთან, ექსპერიმენტების ჩატარებაც მომწონდა და მომავლის პროფესიების მარტივად დაუფლებისთვის პროგრამული აზროვნების განვითარებაც მინდოდა. სწორედ ამ ყველაფერმა ერთად განაპირობა ჩემი გადაწყვეტილება - საკუთარი ძალები STEM მიმართულებით მომესინჯა", — გვიყვება თათია.

ამბობს, რომ მათემატიკისა და ფიზიკის ამოცანებზე მუშაობა მას დიდ სიამოვნებას ანიჭებს, განსაკუთრებით კი ამოცანების ამოხსნით მიღებული სიხარული, რაც ამ საგნებისადმი მის ინტერესს კიდევ უფრო მეტად ამძაფრებს.

თუმცა, როგორც განმარტავს "კრიტიკული აზროვნება, ლოგიკური ანალიზი, კვლევა — ეს ყველაფერი არაა, რასაც STEM სკოლა მოსწავლეებში აყალიბებს, ის ჩემში იწვევს ცნობისმოყვარეობას და ღრმა ფიქრისკენ მიბიძგებს. ეს ყველაფერი სასწავლო პროცესს მუდმივად საინტერესოს და მხიარულს ხდის".

თათია გვიყვება, რომ გაკვეთილებზე მოსწავლეები თეორიული ცოდნის პარალელურად, პრაქტიკულ გამოცდილებასაც იღებენ და ყველა აბსტრაქტულ ინფორმაციას, თეორიებსა თუ ქიმიური რეაქციის ფორმულებს თვალნათლივ, სიმულაციების მეშვეობით ხედავენ.

"STEM სკოლა ზრუნავს, რომ ჩვენ მივიღოთ არა მხოლოდ თეორიული ცოდნა, არამედ ვისწავლოთ მისი პრაქტიკული გამოყენებაც. ეს სასწავლო პროცესს განსაკუთრებით საინტერესოს ხდის და ვფიქრობ, ძალიან მეხმარება წარმოსახვის უნარის განვითარებაში", — აღნიშნავს თათია.

გვიყვება, რომ STEM სკოლაში სწავლა მისთვის ძალიან საინტერესო და სასიხარულო გამოცდილებაა, "სირთულეების მომლოდინე, სასიამოვნოდ გაკვირვებული დავრჩი. იმდენად მომწონს, ვცდილობ დავალება მაშინვე შევასრულო და კვირის გასვლას არ დაველოდო".

"STEM სკოლაში ჩარიცხვა, საქართველოს ბანკის სტიპენდიატობა და საუკეთესო ქულების მქონე ათეულში მოხვედრა იყო ემოციების ზღვა: სიხარული, საკუთარ ძალებში თავდაჯერებულობის შეგრძნება და საინტერესო სიახლეების მოლოდინი... მართალია, ჯერ მომავლის პროფესია არჩეული არ მაქვს, მაგრამ ვიცი, რომ აუცილებლად ტექნიკურ სფეროსთან ექნება კავშირი, შესაბამისად STEM სკოლაში მიღებული ცოდნა იმ ბაზისად იქცევა, რომელიც დამეხმარება მომავალი მიზნების განხორციელებაში", — ამბობს თათია.

საქართველოს ბანკი არ ჩერდება და მთელი საქართველოს მასშტაბით თათიას და მისი თანატოლებისთვის კიდევ უფრო მეტი განვითარების შესაძლებლობის შესაქმნელად არაერთი საინტერესო საგანმანათლებლო ინიციატივის განხორციელებას გეგმავს.