23 მაისს, 11:00 საათზე, წიგნის სახლში ლიგამუსი გაიმართება ოქსფორდის უნივერსიტეტის ემერიტუს-პროფესორის, რიჩარდ სვინბერნის შეხვედრა სტუდენტებსა და პროფესორებთან.

შეხვედრაზე პროფესორი სვინბერნი ისაუბრებს თავის წიგნზე Faith and Reason (რწმენა და აზროვნება), რომელსაც ილიას სახელმწიფო უნივერსიტეტის გამომცემლობა ამზადებს გამოსაცემად.

შეხვედრა განსაკუთრებით საინტერესო იქნება ფილოსოფიისა და რელიგიის საკითხებით დაინტერესებული სტუდენტებისთვის. შეხვედრის დასასრულ პროფესორ რიჩარდ სვინბერნს მიენიჭება ილიას სახელმწიფო უნივერსიტეტის საპატიო პროფესორის წოდება.

ავტორის შესახებ

რიჩარდ სვინბერნმა აკადემიური ცხოვრება დაიწყო ოქსფორდის უნივერსიტეტში, სწავლობდა ფილოსოფიასა და თეოლოგიას. მის განსაკუთრებულ ინტერესს წარმოადგენდა საკითხი – გამართლებულია თუ არა ღმერთის რწმენა, უფრო ზუსტად, რწმენა ქრისტიანული რელიგიის სწავლებისა. იგი ქრისტიანული ტრადიციით აღიზარდა. 1995 წელს დატოვა ანგლიკანური ეკლესია და მიიღო მართლმადიდებლობა.

სვინბერნმა წლები მიუძღვნა ფიზიკური და ბიოლოგიური მეცნიერებების ისტორიას, რაც მისი ფილოსოფიური რეფლექსიის წყარო იყო.

1963 წლიდან ჰალის უნივერსიტეტში კითხულობდა ლექციებს ფილოსოფიაში. 1972 წლიდან კილის უნივერსიტეტის ფილოსოფიის პროფესორია. ამ პერიოდში მისი აკადემიური ინტერესი იყო რელიგიის ფილოსოფია. 1985-დან 2002 წლამდე ქრისტიანული რელიგიის ფილოსოფიის პროფესორი იყო ოქსფორდის უნივერსიტეტში.

1993 წელს აირჩიეს ბრიტანეთის აკადემიის წევრად. ლექციების წასაკითხად მიწვეული იყო მსოფლიოს ბევრ უნივერსიტეტში. 1968 წელს დაიბეჭდა მისი პირველი წიგნი სივრცე და დრო. 1971 წელს გამოვიდა სასწაულის ცნება. 1981-1997 წლებში დაიბეჭდა მისი ტრილოგია რწმენა და აზროვნება, ღმერთის არსებობა, თეიზმის კოჰერენტულობა. პასუხისმგებლობა და ცოდვების გამოსყიდვა (1989), გამოცხადება (1992), ქრისტიანული ღმერთი (1994), განგება და ბოროტების პრობლემა (1998), ეპისტემური გამართლება (2001), განკაცებული ღმერთის აღდგომა (2003), გონება, ტვინი და თავისუფალი ნება (2013). 2023 წლის ბოლოს გამოვა მისი დებატები ჯეიმს სტერბასთან სათაურით დაუშვებდა კი კეთილი ღმერთი ამდენ ტანჯვას?

რიჩარდ სვინბერნი ავტორია პოპულარული წიგნებისა: არსებობს თუ არა ღმერთი? (1996), იყო თუ არ იესო ღმერთი? (2008). რიჩარდ სვინბერნს საპატიო დოქტორის წოდება მიანიჭეს ლიუბლიანის კათოლიკურმა უნივერსიტეტმა (2015), ბუქარესტის დიმიტრი კანტემირის ქრისტიანულმა უნივერსიტეტმა (2016), ლიხტენშტაინის ფილოსოფიის საერთაშორისო აკადემიამ (2017).