33-წლიანი ლოდინის შემდეგ, ნეაპოლის გუნდი იტალიის ჩემპიონი გახდა. საყოველთაო ზეიმს, რომელიც მთელ ქალაქს მოედო, საქართველოს ბანკიც შეუერთდა და ხვიჩა კვარაცხელიას ჩემპიონობა ბანერით მიულოცა.

"გილოცავ, ხვიჩა, არ გაჩერდე", — წერია ქართულად და იტალიურად ბანერზე, რომელიც ნეაპოლის ქუჩებში გამოჩნდა.

აღსანიშნავია, რომ ნეაპოლურმა გუნდმა იტალიის სერია A-ში ბოლოს 1990 წელს გაიმარჯვა. ამჯერად "ნაპოლიმ" ეს ტიტული სეზონის დამთავრებამდე ხუთი ტურით ადრე გაინაღდა. 4 მაისს "ნაპოლი" "უდინეზეს" შეხვდა, მატჩი ანგარიშით 1:1 დაასრულა და 1 ქულა მოიპოვა, რაც საკმარისი იყო ტურნირის ჩემპიონობისთვის.

ქართველი ფორვარდი ნეაპოლის გუნდს 2022 წლის 1 ივლისს შეუერთდა და პირველივე სეზონზე მოახერხა, ჩემპიონობის ტიტული მოეპოვებინა. მან ჯამში 29 მატჩში ითამაშა, 12 გოლი გაიტანა, 10 საგოლე პასი შეასრულა და 3 პენალტი გამოიმუშავა.

ხვიჩა კვარაცხელია გასულ მარტში ზედიზედ მეორედ დასახელდა Seria A-ს თვის საუკეთესო მოთამაშედ. შეგახსენებთ, რომ ქართველი შემტევი სეზონის პირველივე თვეს გამოარჩიეს და აგვისტოს თვის რჩეული გახდა, რასაც თებერვლისა და მარტის საუკეთესო მოთამაშის სტატუსი დაემატა.

საგულისხმოა, რომ იტალიის ჩემპიონატის თვის საუკეთესო მოთამაშედ ერთ სეზონში ორჯერ აქამდე არავინ დასახელებულა. კვარაცხელიამ კი ეს რეკორდი ჯერ კიდევ მარტამდე დაამყარა, მარტში კი ზედიზედ ორჯერ გააუმჯობესა და კიდევ ერთი ახალი რეკორდის შემოქმედი გახდა.

აღსანიშნავია, რომ რაც ეს ჯილდო გაიცემა, ყველა სეზონის ჯამშიც კი სამჯერ რჩეული არავინ გამხდარა. ხვიჩამ მსგავსი წარმატების მიღწევა არასრულ სეზონში შეძლო.

საქართველოს ბანკმა, როგორც ქართული ფეხბურთის აქტიურმა მხარდამჭერმა და ეროვნული ნაკრების მთავარმა სპონსორმა, ხვიჩას გამარჯვებას ორიგინალური ვიდეორგოლიც მიუძღვნა. ნახეთ ვიდეო ამ ბმულზე.