სათამაშოების კომპანია Mattel-მა დაუნის სინდრომის მქონე ბარბი გამოუშვა. Mattel-ის განცხადებით, მათი მიზანია, კიდევ უფრო ბევრმა ბავშვმა შეძლოს საკუთარი თავის საყვარელი თოჯინასთვის მიმსგავსება.

Mattel-მა ჯერ კიდევ 2019 წლიდან გადაწყვიტა ბარბის ისეთი მოდელების გამოშვება, რომლებსაც უფრო რეალური სხეული ექნებოდათ, რაც ნაკლებად გამოყვანილ წელსა და ნორმალური სიგრძის კისერს გულისხმობს. გარდა ამისა, კომპანიამ ბარბები ეტლითა და პროთეზით უკვე გამოუშვა.

ფოტო: Mattel

"ჩვენთვის დაუნი სინდრომის მქონე ბარბიზე მუშაობა დიდი პატივი იყო. ჩვენთვის ძალიან ბევრს ნიშნავს ის ფაქტი, რომ ბავშვებს პირველად მიეცემათ შესაძლებლობა იმ ბარბით ითამაშონ, რომელიც მათ ჰგავს", — ვკითხულობთ Mattel-ის განცხადებაში.

გარდა ბარბის ინკლუზიური ხაზისა, Mattel-მა 2018 წელს პატარა გოგოების გასაძლიერებლად ფემინისტური კამპანია წამოიწყო და ასტროფიზიკოსი, ასტრონავტი და მოსამართლე ბარბები გამოუშვა. 2018 წლის გაზაფხულზე კი, კომპანიამ 17 ცნობილი ქალის ინსპირაციით კოლექციაც შექმნა.