ამის შესახებ ომბუდსმენის აპარატი განცხადებას ავრცელებს.

რატომ არის მნიშვნელოვანი: 6 თებერვალს პარლამენტის თავმჯდომარის ბრძანებით, მედიას ახალი შეზღუდვები დაუწესდა.

  • ჟურნალისტებსა და ოპერატორებს კონკრეტული ქცევის წესების დაცვა ევალებათ.
  • სწორედ მათ დარღვევას ედავება პარლამენტი TV პირველის ჟურნალისტს, რუსუდან დუმბაძესა და ოპერატორ ირაკლი მურმანიშვილს, მთავარი არხის ჟურნალისტს, თათია წოწონავასა და ოპერატორ ზუკა ჩხვირკიას, ასევე ფორმულას ჟურნალისტს, სოფიო გოზალაშვილს — მათ აკრედიტაცია შეუჩერდათ.
  • მედიის ადვოკატირების კოალიცია პარლამენტს მოუწოდებს, სასწრაფოდ აღუდგინონ ჟურნალისტებს აკრედიტაცია.
  • კოალიციის განცხადებით, პარლამენტის გადაწყვეტილება სადამსჯელო ხასიათს ატარებს.

დეტალები: სახალხო დამცველი მიიჩნევს, რომ პარლამენტის თავმჯდომარის 2023 წლის 6 თებერვლის ბრძანებით დამტკიცებული საქართველოს პარლამენტში მასობრივი ინფორმაციის საშუალებათა წარმომადგენლების აკრედიტაციის წესი, რომელიც ამგვარ პრაქტიკას უდევს საფუძვლად, პრობლემურია.

  • აპარატის თქმით, აღნიშნულ წესში არ არის გაწერილი მიღებული გადაწყვეტილების გასაჩივრების საკითხი, ჟურნალისტებისთვის აკრედიტაციის შეჩერების გადაწყვეტილებაში კი, არ არის მითითებული მისი გასაჩივრების ვადა და პროცედურა, რაც კანონმდებლობის აუცილებელ მოთხოვნას წარმოადგენს.
  • ამბობენ, რომ მედიის წარმომადგენლების მიმართ მსგავსი დამოკიდებულება და გადაწყვეტილებები ხელს უშლის ქვეყანაში პოლარიზაციის შემცირებას.
  • სახალხო დამცველი მოუწოდებს საქართველოს პარლამენტის თავმჯდომარეს, სადავო წესში ცვლილება შეიტანოს იმგვარად, რომ რეგულაცია არ იწვევდეს მედიის წარმომადგენლის საქმიანობაში გაუმართლებელ ჩარევას.
  • ჟურნალისტების მიმართ გატარებული ნებისმიერი კანონიერი ღონისძიება კი ეფუძნებოდეს თანასწორობის პრინციპს.
  • "სახალხო დამცველი, როგორც მედიის წარმომადგენელთა მიერ მომართვის, ასევე საკუთარი ინიციატივის საფუძველზე, უკვე სწავლობს აღნიშნულ ფაქტებს", — ნათქვამია განცხადებაში.