სოციალური სამართლიამობის ცენტრი მოუწოდებს შსს-ს, დაუყოვნებლივ დაიწყოს გამოძიება და საქმეზე ჩაატაროს ყველა საჭირო მოქმედებები.

რატომ არის მნიშვნელოვანი: მას შემდეგ, რაც პოსტივის ხელმძღვანელი შალვა რამიშვილი არაერთმა ქალმა სექსუალურ შევიწროებაში ამხილა, POSTV-მ თათია სამხარაძის წინააღმდეგ დისკრედიტაციის ახალი კამპანია დაიწყო.

• პოსტივის გადამღები ჯგუფი 24 მარტს გვიან ღამით, ენმ-ის წევრი დიმიტრი ჩიქოვანის სახლთან მივიდა და ამბობდნენ, რომ მას სამხარაძე გატაცებული ჰყავდა, შემდეგ კი "წყაროს ინფორმაციაზე" აპელირებით სამართალდამცავებს სამხარაძის სავარაუდო გატაცებაზე შეატყობინეს.
• ღამით ჩიქოვანის საცხოვრებელ სახლში პოლიცია მივიდა — 112-ში პროპაგანდისტული მედიის ჟურნალისტმა ნათია ბერიძემ დარეკა.
• პროპაგანდისტული მედია ცდილობს და უნდა ისე წარმოაჩინოს, თითქოს სექსუალურ შევიწროებაზე ქალების მხილებას სამხარაძე გეგმავს და კეზერაშვილი აფინანსებს — მათივე მტკიცებით, კონფლიქტი თანხის ოდენობის განხილვას მოჰყვა.
• ინფორმაცია უარყო როგორც დიმიტრი ჩიქოვანმა, ასევე თათია სამხარაძემ.

დეტალები: სოციალური სამართლიანობის ცენტრი სამხარაძის მიმართ POSTV-ის დამფუძნებლის, შალვა რამიშვილისა და მისი თანამშრომლის მიერ სავარაუდო ადევნებაზე გამოძიების დაწყებას ითხოვს.

• ცენტრი მიიჩნევს, რომ შალვა რამიშვილისა და ნათია ბერიძის ქმედებების ერთადერთი მიზანი სამხარაძისთვის ფსიქიკური ტანჯვის მიყენება და იძულება იყო, შეეწყვიტა მას რამიშვილის მიერ სექსუალურ შევიწროებაზე საუბარი.
• "მიგვაჩნია, რომ გამოვლენილი ქმედებები, წარმოადგენს ქალზე ძალადობის ერთ-ერთ ფორმას, რაც თავისთავად საჭიროებს გამოძიებას და მომხდარისთვის რელევანტური სამართლებრივი შეფასების მიცემას".
• "ძალადობის, დევნისა და შევიწროების მსხვერპლი ქალების ჯეროვანი დაცვა ფუნდამენტურად მნიშვნელოვანია ქალების უსაფრთხოებისთვის, თანასწორობისთვის და პოლიტიკური და საზოგადოებრივი მონაწილეობისთვის".

ცენტრი ხაზს უსვამს სახელმწიფოს როლს და აღნიშნავს, რომ ინსტიტუტებმა ადამიანის უფლებების პატივისცემისა და მიუკერძოებლობის მაღალი სტანდარტები უნდა დაიცვან.

• "ეს განსაკუთრებით მნიშვნელოვანი ხდება მაშინ, როცა შევიწროებისა და ადევნების შესაძლო შემთხვევები მაღალი პოლიტიკური გავლენების მქონე ფიგურებს უკავშირდება".
• "იმ ფონზე, როდესაც საქმეზე ხელისუფლების წარმომადგენლების უსაფუძვლო განცხადებები მოვისმინეთ, რომელიც ქალთა უფლებების დაცვის სულისკვეთებისგან და პატივისცემისგან სრულად დაცვლილი იყო, არსებითად მნიშვნელოვანია სამართალდამცავმა სისტემამ შეძლოს ადამიანის უფლებებზე დაფუძნებული მიდგომების განუხრელი დაცვა".
• დასასრულს ამბობენ, რომ ამ კონტექსტში, სამართალდამცავი ინსტიტუტების ჯეროვანი მუშაობა გენდერული პოლიტიკის მიმართულებით გატარებული რეფორმების დაცვის ერთგვარი ტესტიცაა.