ამის შესახებ საქართველოს დემოკრატიული ინიციატივა განცხადებას ავრცელებს.

რატომ არის მნიშვნელოვანი: 20 მარტს ჟურნალისტმა, მაკო ჯაბუამ შალვა რამიშვილი სექსუალურ შევიწროებაში ამხილა.

• მანამდე თათია სამხარაძე POSTV-ის დაწყებულ მორიგ პროპაგანდისტულ კამპანიას გამოეხმაურა და ფეისბუქზე დაწერა, რომ რამიშვილი სამსახურის შეთავაზებით იტყუებდა ახალგაზრდა გოგოებს ტელევიზიაში, კეტავდა კაბინეტის კარებს და საკუთარი ბინძური ფანტაზიების დაკმაყოფილებას ცდილობდა.
• ბოლო დღეებში არაერთმა ქალმა ამხილა რამიშვილი — ისინი ამბობენ, რომ კომუნიკაციის არასასიამოვნო გამოცდილება ჰქონდათ, გასაუბრებაზე იღებდნენ სექსუალური შინაარსის კითხვებს და განიცდიდნენ დისკომფორტს.
• POSTV-მ კი სამხარაძის წინააღმდეგ დისკრედიტაციის ახალი კამპანია დაიწყო.
• პროპაგანდისტული მედია ცდილობს და უნდა ისე წარმოაჩინოს, თითქოს სექსუალურ შევიწროებაზე ქალების მხილებას სამხარაძე გეგმავს და კეზერაშვილი აფინანსებს — მათივე მტკიცებით, კონფლიქტი თანხის ოდენობის განხილვას მოჰყვა.
• 24 მარტს ტელეკომპანია POSTV-მ, გაავრცელა ინფორმაცია, რომ ნაციონალური მოძრაობის წევრ დიმიტრი ჩიქოვანს შესაძლოა, გატაცებული ჰყავდა თათია სამხარაძე.
• POSTV-ის ჟურნალისტმა, ნათია ბერიძემ თათია სამხარაძის გატაცების შესახებ ინფორმაცია შეატყობინა პოლიციას, რასაც საგამოძიებო მოქმედებები მოჰყვა, გატაცების შესახებ ინფორმაცია უარყვეს ჩიქოვანმაც და სამხარაძემაც.

დეტალები: GDI ეხმიანება თათია სამხარაძის გარშემო ბოლო პერიოდში განვითარებულ მოვლენებს, გმობს შალვა რამიშვილის მიერ ქალების სექსუალური შევიწროების შემთხვევებს და ხელისუფლების წარმომადგენლების მხრიდან არასათანადო, არაადეკვატურ რეაგირებას.

• GDI ამბობს, რომ თათია სამხარაძის გატაცების შესახებ ინფორმაციის გამოგონება და გავრცელება წარმოადგენს რამიშვილის ქმედებების გადაფარვის, სამხარაძისა და სხვა შესაძლო მსხვერპლთა დისკრედიტაციის მცდელობას.
• ამასთანავე, აღნიშნული ინფორმაციის პოლიციისთვის შეტყობინება შეიცავს სავარაუდო დანაშაულის, კერძოდ, ცრუ დასმენის ნიშნებს.
• მათი თქმით, საქართველოს კანონმდებლობით სექსუალური შევიწროება ადმინისტრაციული სამართალდარღვევას წარმოადგენს და ავალდებულებს შესაბამის ორგანოებს მოახდინონ ეფექტიანი რეაგირება.
• მიაჩნიათ, რომ ხელისუფლების წარმომადგენლების განცხადებები ამყარებს საზოგადოებაში არსებულ სტერეოტიპულ დამოკიდებულებებს, თითქოს მსხვერპლი ქალების მიერ გავრცელებული ინფორმაცია არ არის სანდო იმის გამო, რომ მომხდარიდან გარკვეული დრო არის გასული.

DGI ამბობს, რომ ხელისუფლების წარმომადგენელთა ასეთი პოზიცია ახალისებს ქალთა მიმართ ძალადობას, შევიწროებას, აბრკოლებს სამართალდამრღვევთა გამოვლენას და ხელს უწყობს მათ დაუსჯელობას.

• "გარდა ამისა, POSTV-ის პროსამთავრობო პოზიციონირების გათვალისწინებით, ქართული ოცნების წარმომადგენელთა განცხადებები წარმოადგენს POSTV-ისა და შალვა რამიშვილის გამოსარჩლების მცდელობას სექსუალურ შევიწროებაში მამხილებელთა დისკრედიტაციის ხარჯზე", — ნათქვამია განცხადებაში.
• ისინი მოუწოდებენ სამართალდამცავ ორგანოებს, დროულად შეისწავლონ და რეაგირება მოახდინონ შესაძლო ადმინისტრაციული თუ სისხლის სამართლის კანონმდებლობის დარღვევაზე.