ცოტა ხნის წინ ტეილორ სვიფტს iHeartRadio-ს ინოვატორთა ჯილდო გადასცეს. მომღერალმა სიტყვით გამოსვლისას ჯილდოსთვის მადლობა გადაუხადა ჟიურის და ასევე წარუმატებლობისა და მოტივაციის შესახებაც ისაუბრა.

"ძალიან იღბლიანი ვარ, რომ ამ საღამოს ეს ჯილდო მივიღე. ახლა ჩემ მიერ გაკეთებულ სხვადასხვა სწორ არჩევანზე საუბრობენ. თუმცა ყველამ მინდა იცოდეს, განსაკუთრებით ახალგაზრდებმა, იმ ასობით და ათასობით სულელური იდეის შესახებ, რომლებმაც სწორ იდეებამდე მომიყვანა", — განაცხადა ტეილორ სვიფტმა.

The iHeartRadio-ს მუსიკალური დაჯილდოება 2014 წლიდან იმართება და მომღერლებს სხვადასხვა კატეგორიებში ჯილდო გადაეცემათ. წელს ინოვატორის კატეგორიაში ტეილორ სვიფტმა გაიმარჯვა, რომლის ემოციურმა მიმართვამ მომღერლის გულშემატკივრები და დამსწრე საზოგადოება აღაფრთოვანა.

"მიეცით საკუთარ თავს წარუმატებლობის უფლება. ყველანაირად ვცდილობდი, არ დავმარცხებულიყავი, რადგან ეს სამარცხვინო მეგონა, თუმცა მე თავს ამის უფლებას ვაძლევ და შენც უნდა მისცე. ისეთი გადაწყვეტილებები მიიღეთ, რომლებიც თქვენ გეჩვენებათ სწორად. ერთ დღესაც კი ამისთვის ვიღაცამ შეიძლება ჩათვალოს, რომ ინოვატორი ხარ. დიდი მადლობა ამ ყველაფრისთვის", — განაცხადა ტეილორ სვიფტმა ჯილდოს მიღების შემდეგ.

შეგახსენებთ, რომ ტურნე, რომელსაც ტეილორ სვიფტის ფანები დიდი ხნის განმავლობაში ელოდნენ, მომღერალმა ცოტა ხნის წინ დაიწყო. ერთ-ერთ კონცერტზე ტეილორმა 44 სიმღერა შეასრულა, რასაც 3 საათზე მეტი დასჭირდა. ტეილორ სვიფტის ტურნე, სახელად The Eras Tour, 2023 წლის აგვისტომდე გაგრძელდება.