ამის შესახებ ქართული ოცნების დეპუტატი სოციალურ ქსელში წერს.

რატომ არის მნიშვნელოვანი: 17 მარტს სისხლის სამართლის საერთაშორისო სასამართლომ ოკუპანტი ქვეყნის პრეზიდენტის, ვლადიმერ პუტინის დაკავების ორდერი გასცა.

  • ორდერს საფუძვლად უდევს უკრაინაში წამოწყებული სრულმასშტაბიანი ომი.
  • სასამართლო ომის დანაშაულების ჩადენის გამო რუსეთის პრეზიდენტს ინდივიდუალურ სისხლის სამართლის პასუხისმგებლობას აკისრებს.
  • "ვლადიმერ ვლადიმიროვიჩ პუტინი, დაბადებული 1952 წლის 7 ოქტომბერს, სავარაუდოდ, პასუხისმგებელია ომის დანაშაულზე, მოსახლეობის (ბავშვების) უკანონო დეპორტაციაზე და მოსახლეობის (ბავშვების) უკანონო გადაყვანაზე უკრაინის ოკუპირებული ტერიტორიებიდან რუსეთში", — ნათქვამია ტექსტში.

დეტალები: მდინარაძე ამბობს, რომ საქართველო იყო იმ 38 ქვეყანას შორის, რომლებმაც ჰააგას რუსეთის ომის დანაშაულების გამოძიებაზე მიმართა.

  • მისივე თქმით, ამ მიმართვის საფუძველზე დაწყებული გამოძიების შედეგია რამდენიმე დღის წინ გამოცემული დაკავების ორდერიც.
  • "ეს ის დღეებია, როდესაც თბილისში საპროტესტო აქციები იმართებოდა მოტივით, რომ, თითქოს, საქართველოს ხელისუფლება მხარს არ უჭერდა უკრაინას… ეს ის დღეებია, როდესაც უკრაინის ხელისუფლებამ, იგივე მოტივით, საქართველოდან ელჩი გაიწვია", — წერს ქართული ოცნების დეპუტატი.

მდინარაძე იწუნებს ევროკავშირის ზოგიერთი ქვეყნის საკანონმდებლო ბაზას და ამბობს, რომ მათგან განსხვავებით, საქართველოს კანონმდებლობა სრულად არის მორგებული ჰააგის სასამართლოსთან სათანამშრომლოდ.

  • "მსოფლიოში საერთაშორისო სისხლის სამართლის სასამართლოს რომის წესდების მონაწილე 123 ქვეყანაა. დღევანდელი მოცემულობით, მათ შორის არ არიან, მაგალითად, თავად უკრაინა, რუსეთი, აშშ და სხვ. საქართველო, რომის სტატუტის წევრი ქვეყნებიდან, იმ 22 ქვეყანას შორისაა, რომლებსაც სრულად აქვთ მორგებული ქვეყნის საკანონმდებლო ბაზა ჰააგის სასამართლოსთან სათანამშრომლოდ, განსხვავებით ევროკავშირის წევრი 16 ქვეყნისგან".