"ჩვენ ვპასუხობთ ოფიციალურ რეზოლუციას და არა ვერბალურ გამოსვლებს, რაც გამოხატვის თავისუფლების ფარგლებში ჯდება", - ასე უპასუხა საპარლამენტო უმრავლესობის ერთ-ერთმა ლიდერმა, ზაქარია ქუცნაშვილმა აფგან მუხტარლის საქმეზე, ევროპარლამენტის რეზოლუციაზე On.ge-ის შეკითხვას. ქუცნაშვილმა არ უპასუხა ევროპარლამენტარების კრიტიკას, რაც დეპატების დროს გაჟღედა.

ქუცნაშვილის თქმით, ევროპარლამენტის რეზოლუციის ტექსტში წერია ის პოზიცია, რაც აქვს პრემიერ კვირიკაშვილს:

"ოფიციალური რეზოლუციის თანახმად, მოწოდება რომ საქართველომ ჩაატაროს ობიექტური და სამართლიანი გამოძიება, ეს პრემიერის დანაპირებია, ასე რომ ის სრულ შესაბამისობაშია პრემიერის განცხადებასთან".

ევროპარლამენტის ექვსმა პოლიტიკურმა ჯგუფმა საერთო რეზოლუცია შეადგინეს აფგან მუხტარლის საქმეზე, სადაც აზერბაიჯანს დაკავებული ჟურნალისტის გათავისუფლებისკენ, საქართველოს კი გამჭვირვალე გამოძიებისკენ მოუწოდებენ.

დღევანდელ განხილვაზე, ევროპარლამენტარმა პეტრას აუსტრევიჩუსმა თქვა, რომ მუხტარლის საქმის გამოძიებაში, ბაქო და თბილისი პარტნიორები უნდა იყვნენ:

"გამოძიება უნდა იყოს გამჭვირვალე და ჩვენ ყველამ უნდა მივიღოთ მეტი ინფორმაცია, სხვა შემთხვევაში ჩვენი პარტნორობის საკითხი ეჭვქვეშ დადგება".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.