პარტია განცხადებას ვანო მერაბიშვილის Freedom TV-სთან ინტერვიუს შემდეგ ავრცელებს.

რატომ არის მნიშვნელოვანი: ყოფილმა შს მინისტრმა ინტერვიუში თქვა, რომ ენმ სააკაშვილის პარტიაა, რომელსაც ყველა ოპოზიციურ პარტიაზე დიდი რეიტინგი აქვს.

  • მან ასევე პარტიაში ჩატარებულ შიდა არჩევნებზე ისაუბრა, რომლის შედეგადაც ლევან ხაბეიშვილი პარტიის თავმჯდომარე გახდა.
  • მან თქვა, რომ მას შემდეგ რაც ხაბეიშვილმა გაიმარჯვა, პარტიაში ცვლილებები მიმდინარეობს და უფრო მეტად აპროტესტებენ ბევრ რამეს.
  • მერაბიშვილის განცხადდებით, ენმ-ს ლიდერები ცდილობდნენ, რომ სპონტანურად დაწყებული საპროტესტო აქციები არ განევითარებინათ.

დეტალები: ყოფილი მინისტრის განცხადებას მალევე გამოეხმაურა პარტია და აღნიშნეს, რომ ენმ არის დიდი და მრავალფეროვანი პოლიტიკური ორგანიზმი, რომელიც აერთიანებს ნახევარ მილიონზე მეტ საქართველოს მოქალაქეს.

  • "ვანო მერაბიშვილი არის ენმ-ის ერთ-ერთი დამფუძნებელი და გულშემატკივარი, მაგრამ ის არ არის პარტიის მენეჯმენტის ნაწილი, არ უკავია არანაირი პარტიული თანამდებობა, არ ახმოვანებს პარტიის პოზიციებს და არ არის ჩართული ყოველდღიურ პარტიულ საქმიანობაში", — ნათქვამია განცხადებაში.
  • მათივე თქმით, კონკრეტული ინდივიდების მიერ გამოთქმული პირადი მოსაზრებების ირგვლივ, გადაჭარბებულ, ხელოვნურ და სპეკულაციურ მსჯელობებს, პარტია აღიქვამს, როგორც მთავარი ოპოზიციური ძალის დისკრედიტაციის და მთავარი თემიდან ყურადღების გადატანის მცდელობად.
  • ამბობენ, რომ ყველა ადამიანს აქვს საკუთარი აზრისა და სიტყვის გამოხატვის თავისუფლება.
  • "ვანო მერაბიშვილი თავადვე აღნიშნავს, რომ მის მიერ გამოთქმული მოსაზრებები, მისი სუბიექტური აზრია და ის აჟღერებს საკუთარ პირად პოზიციებს. კიდევ ერთხელ, პარტიის პოზიციებს ახმოვანებს მხოლოდ პარტიის მენეჯმენტი", — ვკითხულობთ განცხადებაში.