კობახიძეს ბრიფინგზე, რომლის ძირითადი ნაწილიც ღარიბაშვილის მსგავსად, რუსული კანონის საწინააღმდეგო აქციის მონაწილეებს დისკრედიტაციის მცდელობებს მიუძღვნა, შესაძლო საკადრო ცვლილებებზე ჰკითხეს.

რატომ არის მნიშვნელოვანი: ბოლო დღეებში ვრცელდება ინფორმაცია, რომ რუსული კანონის გამო უმრავლესობიდან რამდენიმე დეპუტატი მანდატის დატოვებას აპირებს.

  • გარდა ამისა, On.ge-ის ინფორმაციით, ამავე მიზეზით იგეგმება ქართული ოცნების თავმჯდომარის, ირაკლი კობახიძის შეცვლა.
  • მედია დაინტერესდა, რა პოზიცია აქვთ პარტიაში გავრცელებულ ინფორმაციებზე.

დეტალები: "უმრავლესობაში ყველაფერი არის ძალიან კარგად", — ასე პასუხობს კობახიძე სადეპუტატო მანდატების დატოვებაზე კითხვას და დასძენს, რომ თუ გუნდში საკადრო გადაადგილება იქნება, ამაზე ისაუბრებენ.

  • გარდა ამისა, მედია დაინტერესდა ყიფიანთან დაკავშირებით არსებულ ინფორმაციაზეც, რომ ის, შესაძლოა, პრემიერმინისტრის პოსტზე ვიხილოთ.
  • "პრემიერმინისტრობაზე იყო საუბარი, ბევრმა ისე აღიქვა მისი განცხადება ვიქტორ ყიფიანთან მიმართებით, რომ ივანიშვილი ამზადებს ახალ პრემიერს, და რადგან ასე გაემიჯნა კობახიძის განცხადებებს, ეს არის ღია გზავნილი, რომ მალე ღარიბაშვილი აღარ იქნება პრემიერი", — ჰკითხეს კობახიძეს.
  • პასუხად კობახიძემ თქვა, რომ როდესაც ივანიშვილის ადვოკატი ხარ და "ხდები უცხოური გავლენის აგენტი, ასეთი დამოკიდებულებით პრემიერი ვერასდროს გახდები".

მანამდე, კობახიძემ თქვა, რომ კვირაზე მეტია, რაც ყიფიანი ივანიშვილის ადვოკატი არ არის და ის ბიძინა ივანიშვილმა "ჩახსნა".

  • რაც შეეხება მიზეზებს, მისი მტკიცებით, ეს რუსული კანონთან დაკავშირებით ყიფიანის კრიტიკულ პოზიციას არ უკავშირდება, მთავარი მიზეზი სხვა იყო, თუმცა ვერ დააკონკრეტებს.
  • "მიზეზი იყო ბევრად უფრო მძიმე, ამაზე ბევრად უფრო მძიმე", — ამბობს ის.