საქართველოდან გაუჩინარებული აზერბაიჯანელი ჟურნალისტის, აფგან მუხტარლის ადვოკატის, არჩილ ჩოფიკაშვილის თქმით, მას შთაბეჭდილება რჩება, რომ გამოძიება იმის გამო ტარდება, რომ არ ჩატარდეს. ამ სიტყვებით შეაფასა TV პირველის ეთერში ჩოფიკაშვილმა მუხტარლის საქმეზე საქართველოში დაწყებული გამოძიება.

ადვოკატის ინფორმაციით, გამოძების ფარგლებში 200-მდე მოწმე დაიკითხა. მისი თქმით, მოწმეებს არ აქვთ ინფორმაცია მუხტარლის შესახებ.

"შემთხვევის ადგილი დათვალიერებულიც კი არაა, დათვალიერების ოქმიც კი არაა საქმეში და მიმდებარე ტერიტორიებიდან არაა ვიდეომასალა ამოღებული, მეტი გასაკვირი რაღა უნდა იყოს, რთულად წარმომიდგენია," - აღნიშნა ჩოფიკაშვილმა.

მისი თქმით, საქმეზე სიახლე ისაა, რომ გამოძიების ინფორმაციით, აფგან მუხტარლი, სავარაუდოდ #4 სამარშუტო ხაზით გადაადგილდებოდა.

რამდენიმე წუთის წინ ევროპარლამენტმა აფგანის საქმეზე რეზოლუცია მიიღო. ექვსმა პოლიტიკურმა ჯგუფმა საერთო რეზოლუცია შეადგინეს აფგან მუხტარლის საქმეზე, სადაც აზერბაიჯანს დაკავებული ჟურნალისტის გათავისუფლებისკენ, საქართველოს კი გამჭვირვალე გამოძიებისკენ მოუწოდებენ.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.