გადაცემა ინტერVIEW-ს წამყვანი, სალომე ასათიანი ამბობს, რომ საზოგადოებრივი მაუწყებლის მენეჯმენტის შეცვლის შემდეგ, მისთვის ნათელი გახდა, რომ არხი "მმართველ პოლიტიკურ კლასთან კრიტიკული დისტანციის შენარჩუნებას" ვერ შეძლებდა. ასათიანი საზოგადოებრივ მაუწყებელზე თავისი გადაცემის დახურვას ფეისბუკში გამოეხმაურა.

"ამ ყველაფერში მთავარი პრობლემა არა “ჩემი გადაცემის დახურვა”, არამედ ის საფრთხეა, რომლის წინაშეც საზოგადოებრივი მაუწყებელი დგას ახლა," - წერს ასათიანი.

პოსტში ასათიანი გადაცემაში საქართველოს ყოფილი პრემიერ-მინისტრის, ბიძინა ივანიშვილის სტუმრობას იხსენებს და წერს:

"სწორედ ამ მიზნებისთვის ვმუშაობდით ბევრს და პატიოსნად. მესმის, რომ ბევრს, ვინც ეს გადაცემა იცის, პირველ რიგში “ივანიშვილთან ინტერვიუ” ახსენდება ხოლმე - რადგან სწორედ მაშინ ველაპარაკეთ ძალაუფლების მთავარ “ღერძს”, იქნება ეს პოლიტიკური თუ ეკონომიკური თვალსაზრისით. მაგრამ ასეთივე უკომპრომისობას ვცდილობდით ყველა სხვა შემთხვევაშიც, როცა ჩვენი სტუმარი პოლიტიკოსი ან საზოგადოების წინაშე რაიმე ფორმით ანგარიშვალდებული პირი იყო."

როგორც დღეს, 13 ივნისს On.ge-სთვის გახდა ცნობილი, საზოგადოებირვმა მაუწყებელმა რადიო თავისუფლებას გადაცემის ივლისის შუა რიცხვებიდან შეჩერების შესახებ წერილი მიწერა.

საზოგადოებრივ მაუწყებელში On.ge-ს სატელეფონო ზარებს ამ ეტაპზე არ პასუხობენ. თუმცა, 26 აპრილს საზოგადოებრივი მაუწყებლის მიმდინარე და ახალი ამბების ბლოკის დირექტორი, გიორგი გვიმრაძე ამბობდა, რომ რადიო თავისუფლებასთან ამ ორი გადაცემის ეთერში განთავსების საკითხზე მოლაპარაკებებს გეგმავდნენ.

საზოგადოებრივი მაუწყებლის მენეჯმენტის გადაწყვეტილებით, 17 ივლისიდან მოამბის გარდა, ყველა გადაცემა დაიხურება. როგორც დოკუმენტში წერია, ეთერში 2017 წლის სექტემბრიდან დაბრუნდება პროგრამული პრიორიტეტების შესაბამისად, კონკურსის წესით შერჩეული ახალი გადაცემები.