ქვეყნის გენერალური პროკურორის განცხადებით, მომხდარი სისხლის სამართლის დანაშაულია და დაწყებულია შესაბამისი საგამოძიებო ქმედებები.

რატომ არის მნიშვნელოვანი: ნოემბრის თვიდან, ირანში ტოქსიკური გაზით მოწამვლის 700 შემთხვევა დაფიქსირდა.

  • ტოქსიკური აირით ძირითადად გოგოები მოიწამლა, რაც გავრცელებული მოსაზრებით, მათი სკოლების დახურვის მიზანმიმართული მცდელობაა.
  • მოწამვლის შემთხვევები ძირითადად ხდება ქალაქ ყუმში, სადაც განლაგებულია მნიშვნელოვანი შიიტური მუსლიმური სალოცავები და ის რელიგიური ხელმძღვანელობა, რომელიც ისლამური რესპუბლიკის ხერხემალს ქმნის.

დეტალები: გავრცელებული ინფორმაციით, სულ მცირე 194 გოგო მოიწამლა გასულ კვირას დასავლეთ ლორესტანის პროვინციაში, ქალაქ ბორუჯერდის ოთხ სკოლაში.

  • სამშაბათს კიდევ 37 მოსწავლე მოწამლა ხაიამის გოგონათა სკოლაში თეირანის მახლობლად.
  • შემთხვევებს მსხვერპლი არ მოჰყოლია, თუმცა ათეულობით ადამიანს აღენიშნება სუნთქვის პრობლემები, გულისრევა და თავბრუსხვევა.
  • გენერალური პროკურორის განცხადებით, საქმეზე არსებული ინფორმაცია "დანაშაულებრივი და განზრახ ქმედებების შესაძლებლობაზე" მიუთითებს.

ამასთანავე, თვის დასაწყისში, სულ მცირე 100-მა ადამიანმა გამართა საპროტესტო აქცია ყუმში, გუბერნატორის ოფისთან.

  • "თქვენ ვალდებულნი ხართ უზრუნველყოთ ჩემი შვილების უსაფრთხოება! მე მყავს ორი ქალიშვილი", — განაცხადა აქციის მონაწილემ.
  • "ეს ომია, ისინი ამას აკეთებენ ყუმში, გოგონების საშუალო სკოლაში, რათა გვაიძულონ, სახლში დავსხდეთ. მათ სურთ, რომ გოგონები სახლში დარჩნენ", — განაცხადა ერთ-ერთი მოწამლული გოგოს დედამ.