ახალი ჩინური მოწყობილობის მეშვეობით, შორ მანძილზე მყოფ პარტნიორებს ერთმანეთის კოცნა ინტერნეტის მეშვეობით შეეძლებათ. მოწყობილობას, რომელიც სილიკონისგანაა დამზადებული და ტუჩების ფორმა აქვს, კოცნის თანმხლები შეგრძნებების გადაცემა ნებისმიერ ადგილას შეუძლია, სადაც ინტერნეტზე წვდომა აქვთ.

მოწყობილობის შემქმნელის თქმით, სილიკონის ტუჩებს რეალური კოცნის გადაცემა წნევის, მოძრაობისა და რეალური ტუჩების ტემპერატურის განმეორებით შეუძლია. კოცნის მოძრაობასთან ერთად, მოწყობილობა ერთი პარტნიორიდან მეორეს კოცნის ხმასაც კი გადასცემს.

ფოტო: Twitter

კოცნის გასაგზავნად მსურველებმა მობილურ ტელეფონში სპეციალური აპლიკაცია უნდა გადმოწერონ და მოწყობილობა ტელეფონს კაბელით დაუკავშირონ. აპლიკაციაში პარტნიორის თანხმობის შემდეგ კი, ვიდეოზარის დაწყება და კოცნა შესაძლებელი ხდება.

ჩინურ სოციალურ ქსელ Weibo-ში მომხმარებლები სილიკონის ტუჩებს აქტიურად განიხილავენ. მართალია, ზოგიერთმა მას "ვულგარული" უწოდა, თუმცა ზოგი ახალი გამოგონებით კმაყოფილია.

"ჩემს პარტნიორს არ სჯეროდა, რომ დისტანციური კოცნა ერთ დღესაც შესაძლებელი გახდებოდა. ამიტომ, ამ მოწყობილობის დანახვისას გაოგნებისგან ყბა ჩამოუვარდა. ეს ერთ-ერთი საუკეთესო სიურპრიზია, რომელიც ჩვენი დისტანციური ურთიერთობის დროს გავუკეთე'', — წერს ერთ-ერთი მომხმარებელი. "მადლობა ტექნოლოგიებს", — ვკითხულობთ კომენტარებში.