ამის შესახებ ქართული ოცნების ერთ-ერთმა ლიდერმა ჟურნალისტებთან ისაუბრა.

რატომ არის მნიშვნელოვანი: 24 თებერვალს, უკრაინის პარლამენტმა, სხვა ქვეყნებთან ერთად, საქართველოს საპარლამენტო დელეგაციაც მიიწვია, თუმცა საქართველო კიევში არ ჩავა.

  • ამის საპასუხოდ განცხადება ჯერ ირაკლი ზარქუამ გაავრცელა და აღნიშნა, რომ როდესაც უკრაინის მაღალჩინოსნები ჩვენს სახელმწიფოს მეორე ფრონტის გახსნისკენ მოუწოდებენ, ეს დიპლომატიური ურთიერთობების სივრცეს აღარ ტოვებს.
  • შემდეგ შალვა პაპუნაშვილმა ძალიან ბევრი ისაუბრა რუსეთზე, სანამ გასცემდა პასუხს შეკითხვას, რატომ არ წავა საქართველოს დელეგაცია 24 თებერვალს კიევში.
  • თუმცა, საბოლოოდ, შეკითხვას არ უპასუხა და მხოლოდ თავი იმართლა.
  • როგორც ჩანს, თავის მართლება ქართულ ოცნებაში "კარგად ნაცადი" ხერხია, რომელიც ირაკლი კობახიძესაც "ეხმარება".

დეტალები: რატომ არ წავა საქართველოს დელეგაცია უკრაინაში — ქართულ ოცნებაში შეთანხმებული მესიჯბოქსი აქვთ. სულ რამდენიმე მიზეზია, რის გამოც ოფიციალური ფორმატით ვიზიტი წარმოუდგენელად მიაჩნიათ.

  • კობახიძე ამბობს, რომ უკრაინელ ხალხს სოლიდარობას უცხადებენ, მაგრამ უკრაინის ხელისუფლების პოზიცია ოფიციალურ ფორმატებში მონაწილეობის საშუალებას არ უტოვებს.
  • "სამწუხარო ვითარებაა ჩამოყალიბებული. უკრაინის ხელისუფლების ნაბიჯები არის პირდაპირ მიმართული, მათ შორის, უკრაინელი ხალხის სუბიექტური ნების წინააღმდეგ", — თქვა კობახიძემ.
  • მან ამჯერადაც, ისევე როგორც ბოლო ერთი წლის განმავლობაში ქართული ოცნების არა ერთმა წევრმა თქვა, რომ უკრაინის ხელისუფლება ქართველ ხალხს პირდაპირ მოუწოდებს მეორე ფრონტისკენ.
  • "როდესაც სრულიად სამარცხვინო ტყუილს ავრცელებენ იმასთან დაკავშირებით, რომ თითქოს საქართველოს ხელისუფლება აწამებს და კლავს მიხეილ სააკაშვილს", — განაცხადა კობახიძემ.
  • მისივე თქმით, ომში მყოფი ქვეყნის ხელისუფლება ტყუილების გავრცელებით არის დაკავებული, რაც წარმოუდგენლად მიაჩნია.